МҮХАҮТ-ын дэргэдэх Ноос ноолуурын зөвлөлийн 2022 оны төлөвлөгөөг баталлаа
МҮХАҮТ-ын дэргэдэх Ноос ноолуурын зөвлөлийн ээлжит хурал 40 гаруй гишүүний бүрэлдэхүүнтэй боллоо. Ноос ноолуурын зөвлөлийн хуралд МҮХАҮТ-ын Ерөнхий нарийн бичгийн дарга С.Баясгалан, БСГ-ын дарга Ж.Оюунчимэг нар оролцож, 2022 онд зохион байгуулах гадаад арга хэмжээ, үзэсгэлэнгүүд, хэрэгжиж байгаа төсөл хөтөлбөрүүдийн тухай болон Бодлогын өмгөөлөл, нөлөөллийн үйл ажиллагааны тухай мэдээлэл өгч, гишүүдийн асуултад хариулт өглөө.
Салбарын бизнес, эдийн засаг, хууль эрх зүйн орчинг сайжруулах, өмгөөлөх, нөлөөлөх, төр хувийн хэвшлийн хамтын ажиллагааг хөгжүүлэх, гишүүд хоорондын уялдаа холбоог сайжруулж мэдээ, мэдээллээр хангах нь зөвлөлийн зорилго. Энэ хүрээнд 2021 онд хэрэгжүүлсэн үйл ажиллагааны тайланг танилцуулсан бөгөөд энэ онд шинээр хийгдэх үйл ажиллагааны төлөвлөгөөнд санал авч, төлөвлөгөөгөө баталлаа. Зөвлөлөөс 2021 онд нийт 8 уулзалт, хэлэлцүүлгийг зохион байгуулсан байна.
Зөвлөлийн гишүүдийн саналаар салбарт тулгамдаж буй асуудлаар тэргүүлэгч гишүүдээр ахлуулан зөвлөлийн гишүүдийн оролцоотой ажлын хэсэг байгуулах шаардлагатай байгааг гишүүд онцоллоо. Үүнд, Ноос ноолуурын салбарын боловсон хүчний бодлого, хууль эрх зүйн орчин, Экспортыг нэмэгдүүлэх, хамтын ажиллагаа, ноолуурын санхүүжилт гэсэн асуудлаар тус тус чиг үүрэг бүхий ажлын хэсэг гарган тэргүүлэгч гишүүдийг сонгож баталлаа.
Зөвлөлийн Тэргүүлэгч гишүүн “Сор кашмер” ХХК-ийн захирал М.Эрдэнэтуяа Ноолуурын санхүүжилтийг шийдвэрлэх ажлын явцын тухай болон Хөнгөн үйлдвэрийн тухай хуулийн төсөл боловсруулах ажлын хэсэг, ХАА-н биржийн тухай хууль, түүхий эдийн худалдан авалт, бусад асуудлаар мэдээлэл өгч Татварын Е-баримттай холбоотой асуудлыг хэрхэн зохицуулж байгаа туршлагаа хуваалцлаа.