Холбооны эрх зүйн тухай хуулийн төсөлд компанийн засаглал, ёс зүйн стандартыг тусгах ажлын санал авах хэлэлцүүлэг боллоо
МҮХАҮТ, “Транспэрэнси Интернешнл Монгол” ТББ, Бизнесийн ёс зүйн төвөөс Холбооны эрхзүйн тухай (ТББ болон Мэргэжлийн холбоод) хуулийн төслийн үндсэн зорилт, үзэл баримтлалын талаар нэгдсэн ойлголтод хүрэх, ашгийн төлөө болон ашгийн бус үйл ажиллагааны зааг ялгаа, мэргэжлийн холбооны удирдлагад компанийн засаглал, ёс зүйн хэм хэмжээг нэвтрүүлэх асуудлаар хуулийн төсөлд тусгах санал авах хэлэлцүүлгийг зохион байгууллаа. Хэлэлцүүлэгт мэргэжлийн холбоод, ТББ-ын 30 гаруй төлөөлөл оролцов.
“Транспэрэнси Интернешнл Монгол” ТББ-ын Тэргүүн Л.Төр-Од хэлэлцүүлгийг дүгнэж хэлсэн үгэндээ “Ашгийн төлөө бус хуулийн этгээд, мэргэжлийн холбоод, ТББ нь ил тод, нээлттэй, хариуцлагатай байх хэрэгтэй. Тиймээс өөрсдөө зохион байгуулалтад орж, дотоод засаглалыг бэхжүүлэхийн тулд олон улсад хүлээн зөвшөөрөгдсөн компанийн засаглал, сайн жишгийг нэвтрүүлэх нь зүйтэй” гэж онцоллоо.
МҮХАҮТ-ын Ерөнхий нарийн бичгийн дарга С.Баясгалан “МҮХАҮТ-ын дэргэдэх Бизнесийн ёс зүйн төвөөр дамжуулан ашгийн төлөө бус байгууллагуудад компанийн засаглалыг бэхжүүлэх чиглэлээр болон Холбооны эрх зүйн байдлын тухай хуулийн төсөлд ТББ, мэргэжлийн холбоодын эрх ашгийг зөвөөр тусгах, эрх зүйн орчныг зөв бүрдүүлэхэд холбогдох төрийн байгууллагуудтай хамтарсан хэлэлцүүлгийг хийх зэргээр хамтран ажиллах боломжтой” гэв.
Оролцогчдын зүгээс хуулийн төсөлд компанийн засаглал, ёс зүйн хэм хэмжээг тусгах нь зүйтэй гэдэгтэй санал нэгдэж байв. Тухайлбал, мэргэжлийн холбоодын хувьд мэргэжлийн ёс зүй нь нийтлэг ёс зүйгээс өөр гэдгийг тодотгосон юм. Үүнээс гадна Холбооны эрх зүйн тухай хуулийн төслийг эргэн харах, ТББ, мэргэжлийн холбоодын оролцоог хангаж, хуулийн төслийн ажлын хэсэгт төлөөлөл оролцуулах, цуврал хэлэлцүүлгүүд өрнүүлэх зэрэг саналуудыг хэллээ.
