Германы худалдаа аж үйлдвэрийн танхимуудын холбооны туршлагаас судлав
МҮХАҮТ болон Германы Худалдаа Аж Үйлдвэрийн Танхимуудын Холбоо (ГХАҮТХ) хоорондын хамтын ажиллагааны “ProValue” төслийн хүрээнд тус танхимуудын холбооны бодлогын өмгөөллийн чиглэлээр хэрэгжүүлж буй үйл ажиллагааны талаар туршлага судлах уулзалт зохион байгуулагдлаа.
ГХАҮТХ-ын Эрх зүйн хэлтсийн дарга Доктор Робин Боррманн Германы Худалдаа Аж Үйлдвэрийн Танхимын тухай хууль, албан журмын гишүүнчлэл, Герман улсаас бусад улсууд дахь ХАҮТ-уудын албан журмын гишүүнчлэлийн талаар мэдээлэл хийв.
ХБНГУ-ын ХАҮТ-ын тухай хуулийн шинэчлэл 2023 оноос эхлэн хэрэгжиж эхлэх бөгөөд одоо байгаа 79 ХАҮТ нь ГХАҮТХ-нд элсэж, ГХАҮТХ нь холбооны улсын шууд хамааралтай олон нийтийн өөрөө удирдах байгууллага болж байгаа аж. Ингэснээр ГХАҮТХ эдийн засгийн бодлогын асуудалд бизнес эрхлэгчдийн нийтлэг эрх ашгийг төлөөлнө гэв. Гишүүнчлэл нь Герман дахь танхимын тогтолцооны чухал шинж чанар байсаар ирсэн бөгөөд энэ нь үндсэн хуульд нийцэж байгааг Холбооны Үндсэн хуулийн шүүх 1962, 2011, 2017 онуудад баталгаажуулсан байна.
Мөн Карлсруэ хотын ХАҮТ-ын Орон нутгийн эдийн засгийн хөгжлийн асуудал хариуцсан эксперт Николас Шруфф Бүс нутгийн түвшин дэх бодлогын өмгөөллийн ажлууд, Бодлогын баримт бичиг боловсруулах, түгээх, хэрэгжилтийг хангуулах, бусад ХАҮТ-ууд, Баден-Вюртенберг мужийн Холбооны Танхим, ГХАҮТХ-той хамтран ажиллах байдлын талаар, Замын хөдөлгөөн, хот төлөвлөлтийн асуудал хариуцсан эксперт Свен Бруне Зам тээврийн бодлого, бүс нутгийн хөгжлийн бодлогын бодит жишээнүүдээс танилцуулав.
Илтгэл танилцуулсны дараа талуудаас харилцан асуулт асууж, мэдээлэл солилцов.
