МҮХАҮТ сургалт, судалгаа, эрдэм шинжилгээний чиглэлээр “Сити” их сургуультай хамтран ажиллана
Өнөөдөр МҮХАҮТ “Сити” их сургуультай хамтран ажиллах санамж бичиг байгууллаа. Санамж бичигт МҮХАҮТ-ын дарга Т.Дүүрэн, “Сити” их сургуулийн Удирдах зөвлөлийн дарга Д.Мөнх-Эрдэнэ нар гарын үсэг зурав.
Уг санамж бичгийн хүрээнд бизнесийн орчныг сайжруулах чиглэлээр эдийн засаг, бизнесийн холбогдолтой хууль тогтоомж, бодлогын бичиг баримтын төсөл боловсруулах болон судалгаа шинжилгээний ажлын хамтран зохион байгуулах юм.
Бизнесийн орчны судалгааг мэргэжлийн байгууллагатай хамтарч хийх нь ач холбогдолтой төдийгүй аль салбарт ямар чиглэлээр мэргэжилтэн бэлтгэх шаардлагатайг тодорхойлж, боловсон хүчнийг бэлтгэхэд бизнесийн төлөөллийн байгууллага боловсролын мэргэжлийн байгууллагатай хамтран ажиллах шаардлагатай байдаг гэдгийг МҮХАҮТ-ын дарга Т.Дүүрэн тодотгоод идэвхтэй үйл ажиллагаа явуулдаг, нэр хүндтэй “Сити” их сургуультай хамтран ажиллах болсондоо таатай байна гэв.
Хамтран ажиллах санамж бичиг байгуулах үеэр “Сити” их сургуулийн Удирдах зөвлөлийн дарга Д.Мөнх-Эрдэнэ “Их сургуулийн зүгээс ажил олгогчдын хэрэгцээ, ажлын байранд тавигдах шаардлагыг хангасан хүний нөөцийг бэлтгэх нь чухал байдаг. Нөгөө талаас эрдэм шинжилгээний судалгааны байгууллага болохын хувьд баялаг бүтээгчид, бизнес эрхлэгчидтэй хамтран ажиллах нь судалгааны ажлын үр өгөөжийг нэмэгдүүлдэг сайн талтай. Өнөөдөр эгнээндээ 5000 гаруй бизнес эрхлэгч, баялаг бүтээгчдийг нэгтгэсэн МҮХАҮТ-тай хамтран ажиллах боломж бүрдэж, хамтын ажиллагааны суурийг тавьж байна” гэж хэллээ.