Монгол, Польшийн Бизнес форум болно
МҮХАҮТ-ын Ерөнхийлөгч О.Амартүвшин, МҮХАҮТ-ын Удирдах зөвлөлийн гишүүн, “Урбанек” компанийн захирал Б.Лхагважав нар Бүгд Найрамдах Польш Улсаас Монгол Улсад суугаа Онц бөгөөд Бүрэн эрхт Элчин сайд Кшиштоф Бойког өнөөдөр хүлээн авч уулзлаа.
Уулзалтын хүрээнд хоёр улсын эдийн засаг, худалдааны хамтын ажиллагааг эрчимжүүлэх, бизнесийн харилцааг тэлэх талаар харилцан санал солилцлоо.
Тодруулбал, талууд цаашид хоёр орны хүнс, барилга, уул уурхайн салбарын харилцаа, хамтын ажиллагааг улам гүнзгийрүүлэх хүрээнд хамтран ажиллахаар болов.
Бүгд Найрамдах Польш Улсаас Монгол Улсад суугаа Элчин сайд Кшиштоф Бойко энэ оны 11 дүгээр сард тус улсын Гадаад хэргийн сайд Збигнев Рау Монгол Улсад айлчлал хийхтэй холбогдуулан “Монгол-Польшийн Бизнес форум”-ыг зохион байгуулахаар төлөвлөж байгаагаа танилцуулж, уг арга хэмжээг зохион байгуулахад дэмжлэг хүслээ.
МҮХАҮТ-ын Ерөнхийлөгч О.Амартүвшин мэдээлэл өгч, харилцан санал солилцсонд талархал илэрхийлж, МҮХАҮТ нь Монголын бизнес эрхлэгчдийг дэмжих, холбох гол чиг үүрэгтэй төдийгүй Танхимын зүгээс бүх санал хүсэлтийг хүлээн авч, дэмжиж ажиллана гэдгээ илэрхийллээ.
