Хариуцлагатай бизнес, бизнесийн шударга байдлын аргачлал хэвшүүлэх модуль сургалтыг амжилттай зохион байгууллаа

2021/08/24 0

Бизнесийн орчин дахь авлигын тархалтыг зогсооход хувийн хэвшлийнхэн хамтрал үүсгэж, “Авлигатай тэмцэх үндэсний хөтөлбөр”-ийн хүрээнд хэрэгжих төсөл, хөтөлбөрүүдэд дэмжлэг үзүүлэх замаар, урт хугацаанд бизнесийн ёс зүй, шударга байдлыг бэхжүүлэх зорилгоор “Бизнесийн ёс зүй, шударга байдлыг бэхжүүлэх төсөл”-ийг МҮХАҮТ, Транспэрэнси интернэшнл ТББ, Рио Тинто Монгол ХХК-тай хамтран хэрэгжүүлж байна. Энэхүү төслийг хэрэгжүүлэх үндсэн нэгж болох МҮХАҮТ-ын дэргэдэх Бизнесийн Ёс Зүйн Төвөөс “Хариуцлагатай бизнес, бизнесийн шударга байдлын аргачлал хэвшүүлэх” модуль сургалтыг энэ сарын 23-24-ний өдрүүдэд амжилттай зохион байгууллаа.

Энэхүү сургалтын модулийн гол зорилго нь компаниудын хариуцлагатай бизнесийн үйл ажиллагааг хэрэгжүүлэх чадавх бэхжүүлэх явдал юм. Сургалтын хөтөлбөр нь Транспарэнси интернэшнл олон улсын байгууллагын Уул уурхай - Тогтвортой хөгжил хөтөлбөрийн хүрээнд боловсруулагдсан аргачлалд суурилсан бөгөөд бизнесийн байгууллагын авлигаас урьдчилан сэргийлэх, ашиг сонирхлын зөрчлөөс ангид байхад дотоод хяналтыг хэрэгжүүлэх, байгууллагын удирдлага болон үйл ажиллагаа, нэр хүндийг энэ төрлийн эрсдэлээс хамгаалахад чиглэгдсэн бодит кейс дээр суурилсан үнэлгээний аргачлал, зааварчилгаа болон сэдвүүдийн хүрээнд системтэй мэдлэг олгох хөтөлбөр юм.

Энэ удаагийн сургалтад Монголын криминологичдын холбоо, Санхүү бизнесийн эрх зүйн судалгааны хүрээлэн, Скайтел групп ХХК, М Си Эс холдинг, Макс импекс ХХК, СҮҮ ХК, Инвескор ББСБ, Хаан банк, Эдүкэйтэд энтерпрайз ХХК, Бороо гоулд ХХК, Таван богд трэйд ХХК болон МҮХАҮТ-ын бизнесийн ёс зүйн сургагч багш нарын төлөөлөл оролцлоо.

Бизнесийн ёс зүйн төв нь 21 аймгийн салбар танхимуудаараа дамжуулж нийт гишүүн байгууллагууд, бизнес эрхлэгчдэд олон улсын жишиг болсон бизнесийн ёс зүйн стандарт, авлигын эсрэг хатуу зогсох зарчим, бусад шаардлагатай мэдээ мэдээлэл, сургалтыг тогтмол системтэйгээр хүргэх юм.