Ерөнхийлөгч У.Хүрэлсүх бизнесийн орчныг сайжруулахад онцгой анхаарал хандуулахаа илэрхийллээ

Монгол Улсын Ерөнхийлөгч У.Хүрэлсүх МҮХАҮТ-ын Ерөнхийлөгч О.Амартүвшин, Дарга Т.Дүүрэн, Удирдах зөвлөлийн гишүүн, “Макс” группийн Ерөнхийлөгч Д.Ганбаатар, Удирдах зөвлөлийн гишүүн, “М-Си-Эс” группийн Дэд ерөнхийлөгч Д.Энхтүвшин нарыг хүлээн авч уулзлаа. Уулзалтын эхэнд МҮХАҮТ-ын Ерөнхийлөгч О.Амартүвшин Монгол Улсын Ерөнхийлөгч У.Хүрэлсүхэд баяр хүргээд ковидын дараах эдийн засгийн “Их сэргэлт” санаачилгаа танилцуулж, хууль эрх зүйн орчинг бүрдүүлбэл төр-хувийн хэвшлийн түншлэлийн хүрээнд томоохон бүтээн байгуулалтуудыг богино хугацаанд хийж, эдийн засгийг сэргээх боломж байгааг тодотгов.

МҮХАҮТ-ын зүгээс гадаадын хөрөнгө оруулалтын хууль, эрх зүйн орчныг сайжруулах, том төслүүдээ хугацаа алдахгүй эхлүүлэх, төслийн менежмент, гүйцэтгэлд анхаарах болон уул уурхайн бус экспортыг нэмэгдүүлэх талаарх саналуудаа илэрхийллээ. Тодруулбал бизнес, эдийн засагтай холбоотой хуулиудыг шинэчлэхэд анхаарах, шаардлагатай тохиолдолд “Цар тахлын дараах эдийн засгийг дэмжих арга хэмжээний тухай хууль”-ийг батлан гарган, эдийн засгийг дэмжих боломжтой талаар танилцууллаа. Мөн экспортыг нэмэгдүүлэх чиглэлд уул уурхайн бус экспортыг дэмжсэн санхүүжилтийн тогтолцоо бий болгох зэргээр уул уурхайн бус экспортыг нэмэгдүүлж нэг тэрбум ам.долларт хүргэх санаачилгыг дэмжин, хамтран ажиллах санал тавилаа.

Ерөнхийлөгч У.Хүрэлсүх бизнесийнхэнд тулгардаг дарамт шахалт, төрөөс хамааралтай гацаа, саадыг арилгах асуудлаар болон гадаадын хөрөнгө оруулалтыг нэмэгдүүлэхэд төрийн тэргүүний хувиар онцгой анхаарал хандуулж ажиллана гэдгээ онцлоод МҮХАҮТ болон баялаг бүтээгчдийг дэмжиж ажиллахаа илэрхийлэв.