МҮХАҮТ-ын дэргэдэх КНХ-ын зөвлөл ээлжит хурлаа зохион байгууллаа
МҮХАҮТ-ын дэргэдэх Компанийн Нийгмийн Хариуцлага (КНХ)-ын зөвлөл 2021 оны 2-р улирлын ажлаа дүгнэж ээлжит хурлаа цахимаар зохион байгууллаа.
Хуралд зөвлөлийн гишүүн компаниуд болох Рио Тинто Монгол ХХК, АПУ ХК, Эрдэнэс Монгол ХХК, Мобиком Корпораци, Оюу Толгой ХХК, Хаан Банк, Ханбогд Кашимер ХХК, Таван Толгой ХХК, Тесо Корпораци, UMC менежментийн зөвлөх компанийн төлөөлөл болон зөвлөлийн дэмжигч гишүүд болох НҮБ-ын Хүүхдийн Сан, Дэлхийн Зөн олон улсын байгууллагуудын Монгол дах төлөөлөгчийн газрын холбогдох ажилтан нар оролцлоо.
КНХ-ын зөвлөлийн гишүүн компаниуд улс орны тогтвортой хөгжлийн төлөө ялангуяа дэлхий дахинд үүсээд буй цар тахлын үед болон түүний дараах орчинд хариуцлагатай бизнесийг тууштай хөгжүүлж түгээн дэлгэрүүлэх нэгдмэл зорилгын хүрээнд ажлын хэсгийн боловсруулсан КНХ-ын хамтын үзэл баримтлалын төслийг хэлэлцлээ. Зөвлөлийн гишүүд энэхүү хамтын үзэл баримтлалыг оны 2 дугаар хагаст эцэслэн батлахаар зорин ажиллаж байна.
Мөн тус уулзалтаар Оюу Толгой ХХК-ийн гадаад харилцааны ахлах ажилтан Ё.Лхамаа тус компанийн нийгмийн хариуцлагын хүрээнд Цагдаагийн Ерөнхий газартай хамтран хэрэгжүүлж байгаа Замын хөдөлгөөний аюулгүй байдлын "Ирээдүйгээ хамгаалъя" аяны талаар танилцууллаа.
ХААН Банкны КНХ, түншлэл хариуцсан ахлах мэргэжилтэн М.Мандахмягмар банкныхаа нийгмийн хариуцлагын тэргүүлэх чиглэлүүд, өнөөдрийг хүртэл хийсэн гол ажлуудаа товч танилцуулав. Мөн НҮБ-ын Даян Дэлхийн Гэрээнд нэгдэн ажилласан Хаан Банкны туршлагаасаа танилцуулж, тогтвортой байдлын төлөөх бизнесийн байгууллагуудын олон улсын хамгийн том энэхүү санаачлагад нэгдэж ажиллахыг зөвлөлийн бусад гишүүддээ уриалав.
Даян Дэлхийн Гэрээний Монгол Улс дахь сүлжээг идэвхжүүлэхэд МҮХАҮТ, зөвлөлийн дарга болон нийт гишүүд илүү анхаарч ажиллахыг харилцан тохиров.
МҮХАҮТ-ын КНХ-ын зөвлөлд нэгдэж ажиллах бол 9164719, project@mongolchamber.mn хаягаар холбогдоно уу.
