“Монгол Улсын ЖДҮ-ийн бараа бүтээгдэхүүнийг Япон улс руу экспортлох нь” сэдэвт онлайн семинар боллоо

2021/06/29 0

МҮХАҮТ болон Япон улсын JETRO байгууллага хамтран хоёр улсын хооронд байгуулсан Эдийн засгийн түншлэлийн хэлэлцээрийн таван жилийн ойн хүрээнд “Монгол Улсын ЖДҮ-ийн бараа бүтээгдэхүүний Япон улс чиглэсэн экспортыг дэмжих нь” сэдэвт онлайн семинарыг 2021 оны 6 дугаар сарын 25-ны өдөр зохион байгууллаа.

Уг семинарыг Япон улсын JETRO байгууллагын дэд ерөнхийлөгч O.Күбота, МҮХАҮТ Ерөнхийлөгч О.Амартүвшин нар нээж үг хэлсэн бөгөөд Япон улсын Эдийн засаг, Аж үйлдвэрийн яамны дэд сайд K.Эжима, Монголын талаас ХХААХҮЯ-ны Төрийн нарийн бичгийн дарга Т.Жамбалцэрэн нар мэндчилгээ дэвшүүллээ.

Тус семинарын үеэр Япон улсын JETRO корреспондент К.Фүжий Японы зах зээлд ороход анхаарах зүйлс сэдвээр илтгэл хэлэлцүүлсэн бол тус улсын Эдийн засаг, аж үйлдвэрийн яамны Худалдааны бодлогын газрын Зүүн Хойт Азийн хэлтэс, Монгол тасгийн дарга Х.Такэда Монгол, Японы хооронд байгуулсан Эдийн засгийн түншлэлийн хэлэлцээрийн хэрэгжилтийн талаар мэдээлэл өглөө. ХХААХҮЯ-ны Жижиг, дунд үйлдвэрийн газрын дарга Я.Эрдэнэсайхан ЖДҮ-г дэмжих Монгол Улсын бодлого, арга хэмжээний талаар оролцогчдод мэдээлэл хийж, харилцан санал солилцлоо. Энэ удаагийн цахим семинарт Япон Улсын JETRO байгууллага, МҮХАҮТ болон Монгол талын болон Япон улсын төр болон хувийн хэвшлийн 300 гаруй төлөөлөл оролцов.