“Гааль-бизнесийн түншлэл 2021” цахим форум амжилттай зохион байгуулагдлаа
Гадаад худалдаа, бизнесийн үйл ажиллагааг хөнгөвчлөх, бизнес эрхлэгчдийн өмнө тулгарч байгаа хүнд суртал, олон шат дамжлагыг багасгах, тэдгээрт бизнесийн таатай орчинг бүрдүүлэх, гааль, татварын үйл ажиллагаа, үйлчилгээний чанарыг сайжруулах чиглэлээр МҮХАҮТ болон Гаалийн Ерөнхий Газар 2008 оноос идэвхтэй хамтран ажиллаж байна.
Тухайлбал, мэдээллийг бизнес эрхлэгчдэд хүргэх, мэдээллийн ил тод нээлттэй тогтолцоог бий болгох, гадаад худалдааны цахим нэг цонхны системийг нэвтрүүлэх зэрэг олон ажлуудыг хэрэгжүүлж ирсэн.
Энэхүү хамтын ажиллагааны хүрээнд “Гааль-Бизнесийн түншлэл-2021” цахим форумыг “Бараа нийлүүлэх олон улсын сүлжээний тасралтгүй үйл ажиллагааг хангахад Гааль-Бизнесийн түншлэлийг чиглүүлэх нь” уриан дор Гаалийн ерөнхий газар, Монголын Үндэсний Худалдаа Аж Үйлдвэрийн танхим, Европын Холбооны Монголын худалдааг дэмжих ТRАМ төсөлтэй хамтран 2021 оны 06 дугаар сарын 17-ны өдөр амжилттай зохион байгууллаа.
Энэ удаагийн цахим уулзалтад Монголын Үндэсний Худалдаа Аж Үйлдвэрийн танхим, Европын Холбооноос Монголын худалдааг дэмжих ТRАМ төслийн баг болон төр, хувийн хэвшлийн 200 гаруй төлөөлөл оролцлоо.
Уулзалтаар “Эм, эмийн хэрэгслийн гаалийн хяналт, шалгалт”, “Интернэт бүрдүүлэлт /Автомашин импортлогч/”, “Итгэмжлэгдсэн аж ахуйн нэгжийн хөтөлбөр” гэсэн 3 сэдвээр хэлэлцүүлэг зохион байгуулж, асуудлыг хэрхэн шийдвэрлэх талаар санал солилцож, ярилцан зарим асуудлыг газар дээр нь шийдвэрлэсэн үр дүнтэй уулзалт болж өндөрлөлөө.
