Хөдөлмөрийн тухай хуулийн төслийг УИХ энэ 7 хоногт хэлэлцэн батална
Хөдөлмөрийн хуулийн шинэчилсэн найруулгын төслийн анхны хэлэлцүүлэг 6 дугаар сарын 17-нд боллоо.
МҮХАҮТ-ын хувьд хөдөлмөрийн хуулийг шинэчлэх зайлшгүй шаардлагатай учраас 2016 оноос Хөдөлмөр Нийгмийн Хамгааллын Яамны ажлын хэсэг, 2018 оноос УИХ-ын чуулган болон Байнгын хорооны хэлэлцүүлэгт бэлтгэх үүрэг бүхий дэд ажлын хэсэгт орж ажилласан бөгөөд хуулийн төсөлд бизнесийн эрхлэгчдийн саналыг нэгтгэн нийт 5 удаа албан бичгээр өгч, ажлын хэсгийн хуралдаануудад тогтмол оролцож тодорхой саналуудыг тавьж хэлэлцүүлж ирсэн.
Мөн УИХ-ын байнгын хороо, ХНХЯ-аас зохион байгуулсан удаа дараагийн хэлэлцүүлгүүдэд томоохон ажил олгогч компаниуд, жижиг дунд бизнес эрхлэгчид оролцуулж байлаа. МҮХАҮТ-аас 2019 оны 4-дүгээр сард УИХ-ын гишүүн, хуулийн төслийг боловсруулах ажлын хэсгийн дарга Ц.Мөнх-Оргилын бизнес эрхлэгчидтэй хийсэн хэлэлцүүлгийг зохион байгуулж, өмнө нь ажил олгогчдын зүгээс тавьж ирсэн саналуудаас тусгагдаагүй 69 саналыг хүргүүлсэн юм. Эдгээрийг нийгмийн зөвшилцлийн гурван тал, ялангуяа Ажил олгогчийн төлөөлөл, Үйлдвэрчний эвлэл санал зөрүүтэй заалт дээр ярилцаж ихэнх асуудлаар талуудтай шийдэлд хүрсэн. Ер нь хуулийн шинэчилсэн найруулгын төсөлд бизнес эрхлэгчдийн дараах чиглэлийн тодорхой саналуудыг тусгуулсан. Үүнд:
- Ажил олгогчид ирэх эдийн засгийн хүндрэлийг бууруулах
- Ажил олгогчийн зүгээс хариуцлагагүй ажилтантай хариуцлага тооцох эрхтэй байх
- Хөдөлмөрийн шинэ харилцаануудыг хуульд тусгах
- Байгууллагын дотоод хэм хэмжээг тогтоох, бизнесийн шийдвэр гаргах үйл явцад үйлдвэрчний эвлэлийн оролцоог эрс бууруулах, хязгаарлах
- “Хамтын хэлэлцээр”-ийг улсын, аймаг, нийслэл, дүүргийн хэмжээнд төдийгүй салбар /салбар дунд/-ын зэрэг олон түвшинд байгуулахыг хамрах асуудлаар хязгаарлах
Хөдөлмөрийн хуулийн шинэчилсэн найруулгын төслийн эцсийн хэлэлцүүлгийг УИХ-ын энэ долоо хоногийн хуралдаанаар хийнэ.