МҮХАҮТ-ын дэргэд Худалдааны бодлогын зөвлөлийг байгууллаа

2021/04/09 0

МҮХАҮТ-ын дэргэд Худалдааны бодлогын зөвлөлийг шинээр байгуулах хурал болж, зөвлөлийн даргаар С.Сайнбатыг сонголоо. С.Сайнбат нь 1996 оноос хойш тус салбарт ажиллаж байгаа бөгөөд 2020 он хүртэл “Номин холдинг” ХХК-д импорт менежерээс Гүйцэтгэх захирал хүртэл дэвшин ажилласан, “Ариг” банк, “Оллоо” ХК, “Хөвсгөл Усан зам” ХК, УИД ХК-иудын ТУЗ-ийн гишүүн юм.

МҮХАҮТ-ын дэргэдэх зөвлөлүүдийн үйл ажиллагааг салбарын бодлогын өмгөөлөл, нөлөөлөл явуулахад илүү чиглүүлэх, тухайн салбарын тулгамдсан асуудлаараа төрийн байгууллагуудтай хамтран ажиллах нь чухал байгааг МҮХАҮТ-ын Ерөнхийлөгч О.Амартүвшин хурлын эхэнд онцоллоо. Танхимын дэргэд худалдаатай холбоотой Экспортыг дэмжих зөвлөл, Импортлогчдын зөвлөл үйл ажиллагаа явуулж байсан бөгөөд худалдааны салбарын бодлогыг том зургаар нь харах, эрх зүйн орчныг сайжруулах, энэ чиглэлээр төр-хувийн хэвшлийн хэлэлцлийг хөгжүүлэх чиглэлээр ажиллах зөвлөл болгон өөрчлөх зайлшгүй шаардлага тулгарчээ.

Худалдааны бодлогын зөвлөлийг шинэчлэн байгуулах хуралд томоохон худалдааны компанийн удирдлагууд оролцсон бөгөөд оролцогчдын зүгээс Худалдааны бодлогын зөвлөлийг байгуулахыг дэмжлээ. Цаашид худалдааны салбарын эрх зүйн орчныг сайжруулах чиглэлээр хийх ажил их байгаатай санал нэгдэж, тэргүүлэх чиглэлээ тодорхойлж үйл ажиллагаагаа үргэлжлүүлэхэд зөвлөлийн гишүүдийн идэвх оролцоо чухал гэдгийг онцоллоо.