МҮХАҮТ, Тайландын ХАҮТ-тай хамтын ажиллагааны харилцан ойлголцлын санамж бичиг байгууллаа
МҮХАҮТ-ын Ерөнхийлөгч О.Амартүвшин Тайландын Хаант Улсын ХАҮТ-тай хамтын ажиллагааны харилцан ойлголцлын санамж бичигт гарын үсэг зурах цахим ёслолын үйл ажиллагаанд оролцов. Уг арга хэмжээнд цахимаар Монгол Улсаас Тайландын Хаант Улсад суугаа Онц бөгөөд бүрэн эрхт Элчин сайд ноён А.Төмөр, Тайландын ХАҮТ-ын Дарга ноён Калин Сарасин болон бусад төлөөллүүд оролцлоо.
Санамж бичгийн хүрээнд Тайландын ХАҮТ-ын дэргэдэх UTCC Их сургууль болон МҮХАҮТ-ын дэргэдэх Бизнес академийн хамтын ажиллагааг эхлүүлэх, цаашид чадварлаг бизнесийн боловсон хүчин бэлтгэхэд хамтран ажиллаж, МҮХАҮТ-ын ажилчид болон орон нутаг дахь гишүүн ААН-үүдийн төлөөллүүдийн ур чадварыг дээшлүүлэх тэтгэлэгт сургалтад хамруулах хүсэлтэй байгаагаа МҮХАҮТ-ын Ерөнхийлөгч О.Амартүвшин онцолсон юм.
Цаашид Танхим хоорондын хамтарсан бизнес уулзалтууд болон арга хэмжээг зохион байгуулах ажлын хүрээнд хоёр орны бизнес эрхлэгчдийг холбож, шинэ түншлэл бий болгон хамтын ажиллагааг өрнүүлэхэд нь идэвхтэй хамтран ажиллахаар тохиролцлоо.