“Цахим экспортыг нэмэгдүүлэх боломж” вебинар амжилттай зохион байгуулагдлаа
Монголын Үндэсний Худалдаа Аж Үйлдвэрийн Танхимаас Гадаад Харилцааны Яамтай хамтран уул уурхайн бус, нэмүү өртөг шингэсэн бараа, бүтээгдэхүүний экспортыг нэмэгдүүлэх, дэмжих, гадаад зах зээлд сурталчлах, худалдан авагчтай холбож өгөх, экспортлогчдыг мэдээллээр хангах зорилгоор “Цахим экспортыг нэмэгдүүлэх боломж” вебинарыг 2021 оны 03 сарын 11-ний өдөр амжилттай зохион байгууллаа.
Вебинарыг нээж МҮХАҮТ-ын дарга Т.Дүүрэн танхимаас “Экспортыг дэмжих чиглэлээр хэрэгжүүлж байгаа болон цаашид хэрэгжүүлэх үйл ажиллагаа”-ны талаар, ГХЯ-ны Гадаад худалдаа, эдийн засгийн хамтын ажиллагааны газрын захирал В.Оюу “Монгол Улсын экспортын өнөөгийн байдал, цаашдын зорилт”-ын талаар тус тус танилцууллаа.
Вебинарын үеэр мэдээллийн технологийн экспортыг дэмжих засгийн газрын бодлого, Европын холбооны Бүртгэгдсэн экспортлогчийн систем (REX)-ийн хэрэглээ, Берлин дэх Монголын Мэдээлэл Худалдааг дэмжих төвийн дэргэдэх "Mongolian Green Labels" дэлгүүр (Showroom)-ээр дамжуулан бараа бүтээгдэхүүнээ сурталчлах, худалдаалах боломж, www.mongolian-green-labels.eu, Гадаад худалдааны санхүүжилт, төлбөр тооцоо, Экспортыг нэмэгдүүлэх санхүүгийн дэмжлэг, БНХАУ-ын зах зээлд онлайн дэлгүүр нээх арга зам ба хэрхэн маркетинг хийх тухай, Цахим экспортын боломжууд, Үндэсний бизнесийн нэгдсэн сүлжээ www.trademongolia.mn, “Mongolian exporters 2021” цахим каталог болон цахим экспортыг дэмжсэн бусад веб сайтуудын талаар танилцуулга, мэдээлэл хийгдлээ.
Вебинарт танхимын гишүүд, экспортлогчид болон экспорт хийхээр бэлдэж буй компаниуд, үйлдвэрлэгчид, МҮХАҮТ-ын салбар танхимууд, мэргэжлийн холбоодын төлөөлөл зэрэг 100 гаруй бизнес эрхлэгчид оролцлоо.
