МҮХАҮТ, БНХАУ-ын худалдаа, бизнесийн хамтын ажиллагааг эрчимжүүлэх цахим хурал зохион байгууллаа

МҮХАҮТ, БНХАУ-ын Жилин хотын Худалдааны Танхим, Монгол Улсаас Хөх хотод суугаа Ерөнхий консулын газартай хамтран хоёр улсын худалдаа, бизнесийн хамтын ажиллагааг эрчимжүүлэх цахим хурал өнөөдөр зохион байгууллаа.

Энэхүү хуралд Монгол Улсаас Хөх хотод суугаа Ерөнхий консул С.Батхуяг, Жилин хотын Худалдааны танхимын Шударга өрсөлдөөн, гадаад худалдааны газрын дарга Ли Фү Тай тэргүүтэй албаны төлөөлөгчид, МҮХАҮТ-ын дарга Т.Дүүрэн нар оролцлоо. Өмнөд хөрш рүү манай улс уул уурхайн бүтээгдэхүүнээс гадна ноос ноолуур, мах, махан бүтээгдэхүүн, самарны экспорт хийж байгааг МҮХАҮТ-ын дарга Т.Дүүрэн онцлоод хоёр тал харилцан бизнесийн тэгш, шударга зарчмаар хамтын ажиллагаагаа шинэ түвшинд гаргах, үүнийг түнш худалдан авагч компаниуд мөн адил хүндэтгэж, нэг нэгэндээ зөв үлгэр дуурайлал үзүүлэх шаардлагатай байгааг нэмж хэллээ.

Хурлаар Жилин хоттой хийж буй гадаад худалдааны эргэлтийг нэмэгдүүлэх, олон жилийн турш дундын зуучлагчаар дамжиж ирсэн хуучин тогтолцоог халж, шууд харилцах, Хятадын банкуудын хөнгөлөлттэй зээлд хамрагдах мөн тэдгээрээр дамжуулж төлбөр тооцоо хийх уян хатан нөхцөлийг бий болгох зэрэг асуудлыг хэлэлцэв. Мөн энэ үеэр ирэх гуравдугаар сард зохион байгуулахаар төлөвлөж буй Хөдөө аж ахуйн тоног төхөөрөмжийн цахим үзэсгэлэнг хэрхэн үр дүнтэй хийх талаар санал солилцов.