(+976) 7727-7070
info@mongolchamber.mn
08:30 - 17:30
Ажлын цаг

"Дэлхий дээрх Марс" олон улсын цахим хурал

2020/11/09 0

Дэлхийн тэргүүлэх Марс судлаачид Монголд "чуулна"

"Дэлхий дээрх Марс" буюу Монголын говь

"Mars on Earth" буюу Монголын говь

Монгол Улсын Ерөнхийлөгчийн ивээл дор Монгол Улсын Засгийн газрын хэрэг эрхлэх газар, Монголын сансрын судалгаа хөгжүүлэлтийн төв /МАРСА/ хамтран 11 дүгээр сарын 13-нд 14:00 цагаас "Mars on Earth" буюу "Дэлхий дээрх Марс" олон улсын хурлыг Төрийн ордны Их танхимд зохион байгуулах гэж байна.

Энэ нь манай улсад сансрын судалгааны чиглэлээр зохион байгуулж анхны томоохон олон улсын хурал болж буйгаараа онцлогтой. Хуралд сансрын судалгаа тэр дундаа Марс гарагийн судалгаа шинжилгээгээр дэлхий дахинаа алдаршсан нөлөө бүхий эрдэмтэд болон дэлхийгээс Марс гараг дээр хөл тавихаар сонгогдсон анхны сансрын нисгэгчид цахимаар оролцоно.

Марс гараг нь шинжлэх ухааны аргаар дэлхийн хүмүүсийг шилжүүлэн суурьшуулах боломжтой хамгийн ойрхон хөрст гараг хэмээгддэг. Марс гарагийг эзэмших хүн төрөлхтний хүсэл тэмүүллийн холбоос нь Монголын говь байх боломжийн талаар олон улсын эрдэмтдийн дунд хэлэлцүүлж, ойлголтоо нэгтгэхэд "Mars on Earth" хурлын гол зорилго оршино.

Хурал үндсэн гурван хэсгээс бүрдэх бөгөөд эхний хэсэгт Марс гарагийг хүн төрөлхтөнд эзэмшүүлэхийг зорьж буй "Марс нийгэмлэг"-ийн үүсгэн байгуулагч Роберт Зубрин, Европын Сансрын төв бол Бельгийн Сансрын нийгэмлэгийг үүсэн байгуулагч Пийр Эммануэль Паулис, Японы болон Арабын Нэгдсэн Эмират Улсын "Марс" хөтөлбөрийн удирдагч Хироэки Акияама, МУИС-ийн Физикийн тэнхимийн профессор Р.Цолмон тэргүүтэй илтгэгчид оролцож "Марс гарагийг эзэмших хүн төрөлхтний алсын хараа" сэдвээр ярилцана.

Хоёрдугаар хэсэгт АНУ-аас Марс дээр хөл тавих анхны хүнээр сонгогдсон Алисса Карсон, Европын холбоо, Франц улсаас Ангараг руу нисгэхээр бэлтгэгдэж буй Камилиа Форнер, Итали улсаас Ангараг руу нисэхээр бэлтгэгдэж буй Линда Раймонд нар оролцож өөрсдийн туршлага, "Марсын үеийнхэн" сэдвээр сонирхолтой ярилцлага өрнүүлнэ.

Хурлын гуравдугаар хэсэгт Америкийн худалдааны танхимын Сансрын зөвлөх Гиллет Гавин, Мэдээллийн технологи, харилцаа холбооны газрын дарга Б.Болор-Эрдэнэ, Норвегийн сансрын байгууллагын үүсгэн байгуулагч Жанике Микелсен тэргүүтэй хүмүүс Сансрын технологи ба цахим шилжилт сэдвийн хүрээн ярилцана.   

Монголын сансрын судалгаа хөгжүүлэлтийн төв Монголын говьд сансрын тусгай аялал жуулчлалын төв, сансар судлалын чөлөөт бүс байгуулахаар зорьж MARS-v төслийг хэрэгжүүлж байгаа билээ. Бидэнд байгаа боломжийг олон улсын Марсын судалгааны салбарын эрдэмтэд хэрхэн дүгнэх бол?