"Ази номхон далайн худалдааны хэлэлцээр ба Монгол улс" семинар амжилттай болж өндөрлөлөө

МУ-ын Гадаад Харилцааны Яам, НҮБ-ын Ази, Номхон Далайн Эдийн Засаг, Нийгмийн Комисс, МҮХАҮТанхим хамтран 2020 оны 10 дугаар сарын 12-ны өдөр “АЗИ НОМХОН ДАЛАЙН ХУДАЛДААНЫ ХЭЛЭЛЦЭЭР БА МОНГОЛ УЛС” семинарыг амжилттай зохион байгууллаа. Уг арга хэмжээнд ГХЭЗХАГ-ын дарга В.Оюу, НҮБ-ын АНДЭЗНК-ын Худалдаа, Хөрөнгө  оруулалт, иновацийн хэлтсийн дарга Mиа Микич нар үг хэлэн нээв. Арга хэмжээнд нийт 80 гаруй аж ахуйн нэгжийн төлөөлөл оролцон мэдээлэл авлаа.

Монгол Улс АНДХХ-т нэгдэн орох хүсэлтээ анх 2009 онд илэрхийлж, 366 нэр төрлийн барааг багтаасан үндэсний хөнгөлөлтийн жагсаалтаар хэлэлцээрийн оролцогч талуудтай хэлэлцээ хийж, нэгдэн орох нөхцөлийг 2018 оны 9 дүгээр сард эцэслэсэн. Улмаар Улсын Их хурлын 2019 оны 12 дугаар сарын 12-ны өдрийн чуулганаас “Ази, Номхон далайн худалдааны хэлэлцээрт нэгдэн орох тухай” хуулийн төслийг соёрхон баталж, Монгол Улс “Ази, Номхон далайн худалдааны хэлэлцээр”-т нэгдэн орж буйгаа нотолсон Батламж жуух бичгийг 2020 оны 09 дүгээр сарын 29–ний өдөр Бангкок хотноо Элчин сайд А.Төмөр НҮБ-ын Ази, Номхон далайн эдийн засаг, нийгмийн Комиссын Гүйцэтгэх нарийн бичгийн дарга Армида Алисжабана-д гардуулснаар хэлэлцээрийн 7 дахь гишүүн улс болсон.

АНДХХ-ийн гишүүн орнууд манай улсын гадаад худалдааны нийт бараа эргэлтийн 70 орчим хувь, экспортын 90 орчим хувь, импортын 30 гаруй хувийг тус тус эзэлдэг болно. Хэлэлцээрт нэгдсэнээр 2.9 тэрбум гаруй хэрэглэгчтэй, эдийн засгийн хурдацтай өсөлттэй АНДХХ-ийн зургаан гишүүн улс руу нийтдээ 10,667 нэр төрлийн бараанд 5-100 хувийн татварын хөнгөлөлт эдлэх боломж нээгдэх юм.

Арга хэмжээнд МҮХАҮТ-ын ахлах мэргэжилтэн Ц.Хулан илтгэл тавин оролцогчдын асуултад хариуллаа.

Ази, номхон далайн худалдааны хэлэлцээр (АНДХХ)-т нэгдсэн Энэтхэг, Хятад, Өмнөд Солонгос, Лаос, Шри-Ланк, Бангладешийн төлөөлөл цахимаар оролцож хэлэлцээрийг хэрэгжүүлэхтэй холбоотой өөрсдийн туршлагаас хуваалцав.

МҮХАҮТанхим, Хэрэглэгч Үйлчилгээний Газар