"Дэвшилд хөтөлсөн жаран" уриан дор тэмдэглэж буй фото зургийн үзэсгэлэн, ёслолын концерт, баярын хурлын үйл ажиллагаа болж өндөрлөлөө
Монголын Үндэсний Худалдаа Аж Үйлдвэрийн Танхим үүсэн байгуулагдсаны 60 жилийн ойн хүрээнд "Дэвшилд хөтөлсөн жаран" уриан дор тэмдэглэж буй фото зургийн үзэсгэлэн, ёслолын концерт, баярын хурлын үйл ажиллагаа болж өндөрлөлөө.
Монголын бизнесийн салбарын тэргүүлэх 1000 гаруй бизнес эрхлэгч, Олон Улсын байгууллагын төлөөлөл, ЭСЯ-д болон Танхимын үе үеийн удирдлагууд оролцов.
Монгол Улсын Их Хурлын Дарга Г.Занданшатар “Дэлхий нийтээр тархаад буй цар тахлын үед бизнес эрхлэгчдээ дэмжих, эдийн засгийг сэргээх, одоогийн бизнесийн орчныг сайжруулахад хүндхэн үүрэг төр засаг ба хувийн хэвшлийн аль алинд нь ноогдож буй хариуцлагатай энэ цаг үед төр хувийн хэвшлийн харилцан ойлголцол, хамтын ажиллагаа маш чухал бөгөөд МҮХАҮТ-тай нягт хамтран ажиллах нь нэн чухал юм. Ирээдүйн 60 жилийн бизнесийн орчин, эдийн засгийн хүндрэл бэрхшээлийг даван туулахад Засгийн газар болон нийт бизнес эрхлэгчид Танхимтай хамтран ажиллахаас эхэлнэ" гээд Танхимын үе үеийн удирдлага, албан хаагч, нийт гишүүд, бизнес эрхлэгчдэд ойн баярын мэнд хүргэлээ.
