(+976) 7727-7070
info@mongolchamber.mn
08:30 - 17:30
Ажлын цаг

Бондын төлбөрөө 100 хувь өөрийн эх үүсвэрээр төлсөн ХХБ-д МҮХАҮТ-аас баяр хүргэлээ

2020/05/25 0

МҮХАҮТ-ын “Gold” гишүүн Худалдаа хөгжлийн банк нь Монгол Улсын ТОП-100 ААН-ийн нэгээр 19 дэхь жилдээ өргөмжлөгдлөө.

Худалдаа хөгжлийн банк нь 2015 онд Засгийн газрын дотоод үнэт цаасаар баталгаажсан, өөрийн эзэмшлийн, 5 жилийн хугацаатай, 500 сая ам.долларын бондыг амжилттай гаргаж байв.

Тухайн цаг мөчид олон улсын санхүүгийн хямралын дараа дэлхийн томоохон улс орнуудын эдийн засгийн бүтэц өөрчлөгдөж, үүнээс шалтгаалан түүхий эдийн экспорт давамгайлсан улс орнуудад бизнес эдийн засгийн шинэ орчин үүсч, хүндхэн сорилтууд тулгарч байсан билээ.

Монгол Улсад ч эдийн засаг буурч, гадаад худалдааны нөхцөл муудсан байсан бөгөөд тус банк бонд гаргасан нь улсын гадаад валютын нөөцийг нэмэгдүүлэх, үндэсний мөнгөн тэмдэгтийн ханшийг тогтворжуулахад болон эдийн засгийн худалдааны өрсөлдөх чадварыг нэмэгдүүлэхэд чухал ач холбогдолтой үйл явдал болсон юм.

2020 онд дэлхий дахинд цар тахал дэгдэж, Монгол Улс ч санхүү эдийн засгийн шинэ, амаргүй сорилтуудтай тулгарсан, Европын холбооны хар жагсаалтад орсон зэрэг хүндрэлтэй цаг үед Худалдаа хөгжлийн банк нь дээрх бондын төлбөрөө 100 хувь өөрийн эх үүсвэрээр төлөөд байна.

Энэ нь улс орны өрийн дарамтыг бууруулах, цаашлаад Монгол Улсын зээлжих зэрэглэл, эдийн засгийн урт хугацааны дундаж өсөлтөд эерэг нөлөө үзүүлэх, олон улсын тавцанд Монгол Улсын нэр хүндийг өргөхөд хувь нэмэр оруулсан томоохон үйл явдал боллоо гэж эдийн засагчид дүгнэж байна.

Ингэснээр Худалдаа Хөгжлийн банк нь 2007 оноос хойш олон улсын зах зээлд 5 удаагийн, нийт 1.14 тэрбум ам.доллартой тэнцэхүйц бондыг амжилттай арилжаалсан Монгол Улсын хамгийн анхны аж ахуйн нэгж болж байна.

Бизнесийн томоохон төлөөллийн байгууллагын хувиар, МҮХАҮТ-ын удирдах зөвлөл, нийт гишүүдийн өмнөөс Худалдаа хөгжлийн банкны удирдлага, хамт олонд баяр хүргэж, цаашдын ажил бизнест өндөр амжилт хүсье.