МҮХАҮТ-ын Ерөнхийлөгч О.Амартүвшин ГХЯ-ны Төрийн нарийн бичгийн дарга Д.Даваасүрэнтэй ГХЯ-нд уулзлаа
Төрийн нарийн бичгийн дарга НҮБ-ын Бизнес ба хүний эрхийн удирдах зарчмыг хэрэгжүүлэх, үндэсний хөтөлбөр боловсруулах Засгийн газрын бодлого, шийдвэрийг танилцуулж, өнөөг хүртэл хийсэн тодорхой ажил, арга хэмжээний талаар мэдээлэл өгөв.
Хүний эрхийг хүндэтгэдэг бизнесийн соёлыг түгээн дэлгэрүүлэх нь бизнесийн тогтвортой өсөлтийг хангах, улмаар ардчиллыг бэхжүүлэхэд ач холбогдолтойг мөн онцоллоо. Бизнес ба хүний эрхийн удирдах зарчмыг хэрэгжүүлэх, үндэсний хөтөлбөр боловсруулах ажилд МҮХАҮТ манлайлж бизнес эрхлэгчид, аж ахуйн нэгжийн идэвхтэй оролцоог хангаж хамтран ажиллахыг хүсэв.
МҮХАҮТ-ын Ерөнхийлөгч О.Амартүвшин бизнесийн ёс зүй, хүний эрх, авилгатай тэмцэх чиглэлээр түнш байгууллагуудтай хамтын ажиллагаа эхлүүлж байгааг онцолж, Танхимын гишүүн байгууллага, аймаг орон нутгийн салбараараа дамжуулан Бизнес ба хүний эрхийн удирдах зарчмыг хэрэгжүүлэх, үндэсний төлөвлөгөө боловсруулах ажлыг бүх талаар дэмжиж ажиллана гэдгээ илэрхийлэв.
Уулзалтын төгсгөлд ГХЯ, МҮХАҮТ хоорондын хамтын ажиллагааны явц, энэ онд хамтран хэрэгжүүлэхээр төлөвлөж буй томоохон арга хэмжээний талаар санал солилцлоо.
