МОНГОЛ, ТАЙВАНИЙН БИЗНЕСИЙН ХАМТЫН АЖИЛЛАГААГ ӨРГӨЖҮҮЛЭХ 21 ДЭХ УДААГИЙН УУЛЗАЛТ БОЛЛОО
Монголын Үндэсний Худалдаа Аж Үйлдвэрийн Танхим болон Тайванийн Олон улсын эдийн засгийн хамтын ажиллагааны нийгэмлэг (CIECA) хамтран Монгол, Тайванийн бизнесийн харилцааг өргөжүүлэх, аж ахуйн нэгжүүдийн шууд харилцаа холбоог нэмэгдүүлэх, худалдаа, хөрөнгө оруулалтын шинэ боломжийг бий болгох зорилгоор Монгол, Тайванийн бизнесийн 21 дэх удаагийн уулзалтыг Улаанбаатар хотноо амжилттай зохион байгууллаа
Энэ удаагийн уулзалтаар биотехнологи, эрүүл мэнд, аялал жуулчлал, хиймэл оюун ухаан, дижитал технологи, инноваци зэрэг салбарын хөгжил, бизнесийн боломж, туршлагын талаар мэдээлэл солилцов. Мөн Тайванийн бизнесийн төлөөлөгчид эмийн үйлдвэр, барилгын шинэ төсөл, хүнсний үйлдвэрүүдийн үйл ажиллагаатай танилцаж, Монголын үйлдвэрлэл, бизнесийн орчин болон хөрөнгө оруулалтын боломжуудтай газар дээр нь танилцсан байна.
Манай улс байгалийн баялаг, эрчим хүч, хөдөө аж ахуй, хүнс, аялал жуулчлал зэрэг салбарт өргөн боломжтой бол Тайвань нь технологи, инноваци, үйлдвэрлэл, электроник, биотехнологи болон дижитал хөгжлийн чиглэлээр өндөр түвшинд хүрсэн туршлагатай юм. Иймд харилцан бие биенээ нөхөх эдгээр давуу талд тулгуурлан худалдаа, хөрөнгө оруулалт, хамтарсан үйлдвэрлэл, технологийн шилжилт, экспорт болон шинэ бүтээгдэхүүн хөгжүүлэлт зэрэг чиглэлээр хамтын ажиллагааг өргөжүүлэх боломжтойг талууд онцоллоо.
МҮХАҮТ-ын зүгээс Монгол, Тайванийн бизнес эрхлэгчдийг цаашид холбон ажиллаж, хоёр талын худалдаа, хөрөнгө оруулалт, технологи, бизнесийн түншлэлийг хөгжүүлэхэд дэмжлэг үзүүлэн ажиллахаа илэрхийллээ.
