ДОРНЫН ЭДИЙН ЗАСГИЙН XI ЧУУЛГА УУЛЗАЛТАД МОНГОЛ, ЕАЭЗХ БОЛОН ТҮҮНИЙ ГИШҮҮН ОРНУУДТАЙ БАЙГУУЛСАН ХУДАЛДААНЫ ТҮР ХЭЛЭЛЦЭЭРИЙГ ХЭРЭГЖҮҮЛЭХЭД МОНГОЛ-ОРОСЫН БИЗНЕСИЙН ХАМТЫН АЖИЛЛАГААГ ӨРГӨЖҮҮЛЭХ АСУУДЛЫГ ХЭЛЭЛЦЛЭЭ
Дорнын эдийн засгийн чуулга уулзалтыг ОХУ-ын Ерөнхийлөгч В.В.Путины санаачилгаар 2015 оноос хойш зохион байгуулж ирсэн бөгөөд эдүгээ Ази, Номхон далайн бүс нутгийн эдийн засаг, олон улсын харилцаа, хамтын ажиллагааны томоохон платформ болон өргөжөөд байна.
Энэ удаагийн XI чуулга уулзалт “Алс Дорнод — Хөгжил цэцэглэлтийг хүний сайн сайхны төлөө” сэдвийн хүрээнд зохион байгуулагдлаа. Чуулга уулзалтаар ОХУ-ын Алс Дорнодын бүс нутгийн эдийн засгийн чадавх, хөрөнгө оруулалтын боломжийг олон улсад сурталчлах, Ази, Номхон далайн бүс нутгийн улс орнуудтай худалдаа, эдийн засаг, технологийн хамтын ажиллагааг гүнзгийрүүлэх, тээврийн шинэ коридоруудыг хөгжүүлэх, хотуудын мастер төлөвлөгөөг хэрэгжүүлэх чиглэлээр асуудал, шийдлүүдийг хэлэлцэв.
Чуулга уулзалтын хүрээнд Монгол, Оросын бизнес эрхлэгчдийн хооронд анх удаа “Business Dialogue” буюу Монгол–Оросын ажил хэргийн уулзалт зохион байгуулагдсан нь онцлох үйл явдал боллоо. Энэхүү уулзалтаар Монгол Улс болон Евразийн эдийн засгийн холбоо (ЕАЭЗХ), түүний гишүүн орнуудын хооронд байгуулсан Түр хэлэлцээрийн хэрэгжилт, тарифын бус саад бэрхшээл, тэдгээрийг даван туулах хамтын арга зам, тээвэр, логистикийн асуудлыг хэлэлцжээ.
Монгол–Оросын бизнес хэлэлцүүлгийн үеэр МҮХАҮТ-ын Ерөнхийлөгч Б.Лхагважав Худалдааны түр хэлэлцээрийн тарифын хөнгөлөлтийг бизнес эрхлэгчдэд бодитойгоор хүргэж, хэрэгжилтийн явцад тулгамдаж буй асуудлыг шуурхай шийдвэрлэх байнгын механизм бүрдүүлэх шаардлагатайг онцоллоо. Мөн бизнесийн бодит хэрэгцээ болон хоёр талын худалдааны нөхцөл байдалд үндэслэн тарифын хөнгөлөлтөд хамрагдах барааны жагсаалтад шаардлагатай нэмэлт, өөрчлөлт оруулах боломжийг идэвхтэй ашиглах нь зүйтэйг тэмдэглэв.
Үүнтэй холбогдуулан МҮХАҮТ-ын Ерөнхий нарийн бичгийн дарга Б.Саруул Евразийн эдийн засгийн холбоо (ЕАЭЗХ)-той байгуулсан Түр хэлэлцээрийн хэрэгжилтийг богино хугацаанд үр дүнтэй хангах чиглэлээр тодорхой санал, шийдлүүдийг танилцуулж илтгэл тавилаа.
Үүнээс гадна байгаль хамгаалал, тэр дундаа ховордсон махчин шувуудын тоо толгойг хамгаалах, өсгөх чиглэлээр олон улсын эрдэмтэн, судлаачид, төлөөлөгчид туршлага солилцсон “Шонхор шувууны өдөр” олон улсын чуулга уулзалт зохион байгуулагджээ. Түүнчлэн ОХУ-ын Алс Дорнодын бүс нутгуудын соёл, уламжлал, хоолны өвөрмөц онцлогийг сурталчилсан “Алс Дорнодын гудамж” үзэсгэлэн зэрэг дагалдах томоохон арга хэмжээнүүд мөн зохион байгуулагдаж, чуулга уулзалт өндөрлөв.
