“ТҮНШЛЭЛ–2026” ОЛОН УЛСЫН БИЗНЕС ФОРУМ БОЛЛОО
Монголын Үндэсний Худалдаа Аж Үйлдвэрийн Танхимын Их танхимд Монгол, Хятад, БНСУ, Индонезийн бизнес, мэргэжлийн байгууллагын төлөөллийг нэгтгэсэн “Түншлэл–2026” олон улсын бизнес форум боллоо. Форумыг Монголын Үндэсний Худалдаа Аж Үйлдвэрийн Танхим, Гадаад харилцааны яам болон Эх дэлхийн цэвэр ус , цэнгэг агаар, ногоон төгөл нийгэмлэг дэмжин, МҮХАҮТ-ын Гадаад харилцаа, хамтын ажиллагааны газрын дарга Э.Солонго, ГХЯ-ны Олон улсын худалдаа, эдийн засгийн хэлтсийн дарга Г.Өлзийсайхан нар модератороор удирдан явууллаа.
Форумын нээлтэд Монгол Улсын Их Хурлын гишүүн, Гадаад харилцааны сайд Б.Батцэцэг, Монгол Улсын Соёлын элч, “Эх дэлхий, цэвэр агаар, цэнгэг ус, ногоон төгөл нийгэмлэг”-ийн тэргүүн Б.Гантогоо нар үг хэллээ.
МҮХАҮТ-ын Гүйцэтгэх захирал Ц.Магнайбаатар хэлсэн үгэндээ Монгол, Хятад, БНСУ, Индонезийн бизнесийн байгууллагуудын хамтын ажиллагааг өргөжүүлж, худалдаа, хөрөнгө оруулалт, хамтарсан үйлдвэрлэл, технологи, инноваци болон бусад салбарт шинэ боломжуудыг нээх өргөн боломж байгааг онцоллоо.
Форумын хүрээнд худалдаа, хөрөнгө оруулалт, экспорт, импорт, технологи, инноваци, боловсрол, аялал жуулчлалын чиглэлээр санал солилцож, B2B уулзалтаар бизнесийн шинэ түншлэл тогтоох, хамтарсан төсөл, хөрөнгө оруулалтын боломжуудыг хэлэлцэв.
Мөн МҮХАҮТ-ын Эдийн засгийн судалгааны институтийн дарга О.Түмэн-Амар “Монголын бизнес, хөрөнгө оруулалтын орчин” сэдвээр илтгэл тавьж, Монгол Улсын эдийн засгийн өнөөгийн нөхцөл байдал, гадаад худалдаа, хөрөнгө оруулалтын орчин болон тэргүүлэх салбаруудын боломжийн талаар танилцууллаа. Тэрээр хөдөө аж ахуй, боловсруулах үйлдвэрлэл, аялал жуулчлал, сэргээгдэх эрчим хүч, уул уурхай, мэдээллийн технологийн салбар дахь хөрөнгө оруулалт, бизнесийн хамтын ажиллагааны боломжийг онцлон танилцуулсан юм
Тус форум нь дөрвөн улсын бизнес эрхлэгчдийн харилцаа, хамтын ажиллагааг өргөжүүлэх, шинэ зах зээл, хөрөнгө оруулалт болон бизнесийн түншлэлийн боломжийг нээсэн арга хэмжээ боллоо.
