МҮХАҮТ БОЛОН МИТА ТББ ХАМТЫН АЖИЛЛАГААНЫ САНАМЖ БИЧИГТ ГАРЫН ҮСЭГ ЗУРЖ, БИЗНЕСИЙН САЛБАРЫН ДИЖИТАЛ ШИЛЖИЛТИЙГ ЭРЧИМЖҮҮЛЭХЭЭР НЭГДЛЭЭ

Монголын Үндэсний Худалдаа, Аж Үйлдвэрийн Танхим болон Мэдээллийн технологийн нэгдсэн холбоо (МИТА) ТББ нь хоёр байгууллагын хамтын ажиллагааг өргөжүүлж, бизнесийн салбарын дижитал шилжилтийг эрчимжүүлэх зорилгоор хамтран ажиллах харилцан ойлголцлын санамж бичигт гарын үсэг зурлаа.

Энэхүү түншлэл нь мэдээллийн технологийн салбарын бодлого, зохицуулалт, дэд бүтцийн хөгжлийг бизнесийн бодит эрэлт хэрэгцээтэй нягт уялдаатай хөгжүүлэхэд чиглэж байгаагаараа онцлог юм. Тодруулбал, талууд аж ахуйн нэгж, бизнес эрхлэгчдэд технологийн шинэчлэл хийх, дижитал ур чадварыг эзэмших, мөн кибер аюулгүй байдлаа хангахад нь бодит дэмжлэг үзүүлэх чиглэлээр байнгын, тогтвортой хамтран ажиллахаар тохиролцов.

Санамж бичгийн хүрээнд дижитал шилжилт болон инновацийн бодлого, стратегийг боловсруулахад харилцан санал солилцох, технологийн дэвшилтэт шийдэл, платформуудыг бизнес эрхлэгчдийн үйл ажиллагаанд нэвтрүүлэхэд түлхэц үзүүлэх ажээ. Түүнчлэн мэдээллийн технологийн салбарын хууль тогтоомж, бодлогын баримт бичгийн төсөлд бизнесийн байгууллагуудын дуу хоолой, саналыг тусгуулах, судалгаа шинжилгээний тайлан, статистик мэдээллийг харилцан солилцох өргөн боломж бүрдэж байна.

Үүнээс гадна хоёр байгууллага дотоод, гадаадын хөрөнгө оруулалт, технологийн түншлэлийг татах зорилгоор хамтарсан форум, уулзалт, арга хэмжээг зохион байгуулахаар төлөвлөжээ. Тодруулбал, МҮХАҮТ-ын дэргэд бизнесийн байгууллагуудын нэгдсэн саналыг боловсруулах, технологийн шинэчлэл болон дижитал шилжилтийг дэмжих санаачилга гаргаж, хэрэгжилтэд нь хяналт тавих чиг үүрэг бүхий “Технологийн зөвлөл”-ийг хамтран байгуулахаар тохиролцлоо.