САНХҮҮГИЙН САЛБАРЫН ШИНЭ БОЛОМЖ, ЭРХ ЗҮЙН ШИНЭЧЛЭЛ СЭДВЭЭР ХЭЛЭЛЦҮҮЛЭГ ЗОХИОН БАЙГУУЛАГДЛАА
“Хамтын санхүүжилтийн тухай” хуулийн төслийн хэлэлцүүлэг арга хэмжээг УИХ-ын гишүүн О.Саранчулуун, МҮХАҮТ-ын гүйцэтгэх захирал Ц.Магнайбаатар нар нээж үг хэллээ. Энэхүү хэлэлцүүлгээр Санхүүгийн зохицуулах хороотой хамтран боловсруулсан уг хуулийн төслийн танилцуулга болон филантропийн салбарын олон улсын чиг хандлагыг хэлэлцсэн юм.
Дэлхий дахинд хамтын санхүүжилтийн зах зээл эрчимтэй тэлж, 2024 онд 2.1 тэрбум ам.доллар хүрсэн бол 2030 он гэхэд 5.5 тэрбум ам.долларт хүрэх төлөвтэй байгаа энэ цаг үед Монгол Улсад уг салбарыг ил тод, зохицуулалттай эрх зүйн орчинд хөгжүүлэх шаардлагатай байгааг оролцогчид онцоллоо. Таван бүлэг, 23 зүйлтэй уг хуулийн төсөл нь хамтын санхүүжилтийн үйлчилгээ үзүүлэгчийн эрх зүйн үндсийг тодорхойлж, хувьцаа, зээл, урамшуулал, хандивт суурилсан дөрвөн төрлийн харилцааг зохицуулахаар тусгасан байна.
Хуулийн төсөл батлагдсанаар гарааны болон жижиг, дунд үйлдвэрлэл, үйлчилгээ эрхлэгчдэд санхүүжилтийн шинэ эх үүсвэр бүрдэж, хөрөнгө оруулагчдад таатай боломж нээгдэх юм. Мөн Санхүүгийн зохицуулах хорооноос 2021 оноос хойш хэрэгжүүлсэн сэндбокс зохицуулалтын орчинд 64 төслийн санхүүжилтэд 34.1 сая төгрөг татаж, P2P болон бусад үйлчилгээгээр дамжуулан олон тэрбум төгрөгийн арилжаа амжилттай хийсэн туршлагад үндэслэн энэхүү эрх зүйн орчныг бүрдүүлж буйг тэмдэглэв.
Хэлэлцүүлгийн үеэр мөн филантропи буюу нийгмийн сайн сайхны төлөөх сайн дурын, системтэй дэмжлэг үзүүлэх үйл ажиллагааг уламжлалт хэлбэрээс илүүтэй институцид суурилсан, стратегитай, үр дүнд чиглэсэн хэлбэрт шилжүүлэн хөгжүүлэх нь чухал болохыг хэлэлцлээ.
