ЭРЧИМ ХҮЧНИЙ ШУДАРГА ШИЛЖИЛТ БОЛОН ЗАЛУУЧУУДЫН ХӨДӨЛМӨР ЭРХЛЭЛТИЙГ ДЭМЖИХ ЗОРИЛГОТОЙ ГУРВАН ТАЛТ БОДЛОГЫН ХЭЛЭЛЦҮҮЛЭГ УЛААНБААТАР ХОТНОО БОЛЛОО
НҮБ-ын Цөлжилттэй тэмцэх конвенцын COP17-ын хүрээнд Олон улсын хөдөлмөрийн байгууллага (ОУХБ) Ногоон эдийн засгийн төлөөх түншлэл (PAGE) болон БНСУ-ын Засгийн газрын санхүүжилттэй хэрэгжиж буй Залуучуудын хөдөлмөр эрхлэлтийг дэмжих (YEPP) төслийн хүрээнд Монгол Улсын эрчим хүчний шударга шилжилт, залуучуудын хөдөлмөр эрхлэлт, ногоон ажлын байрны асуудлаарх бодлогын хэлэлцүүлгийг хамтран зохион байгууллаа.
Уг хэлэлцүүлэгт Монголын Үндэсний Худалдаа Аж Үйлдвэрийн Танхимыг төлөөлөн ТХГ-ын дарга А.Энэрэл, Эдийн засгийн судалгааны институтын дарга О.Түмэн-Амар, мэргэжилтэн Б.Амаржаргал нар оролцов.
Хэлэлцүүлэгт Засгийн газар, ажилтан болон ажил олгогчийн төлөөллийн байгууллагууд оролцож, Монгол Улсын эрчим хүчний шилжилтийн тэргүүлэх чиглэл, уур амьсгалын өөрчлөлтийн хүрээнд хүлээсэн үүрэг амлалт, тэдгээрийн хөдөлмөр эрхлэлт, ур чадвар, нийгмийн хамгаалал болон зохистой хөдөлмөрт үзүүлэх нөлөөллийн талаар санал солилцсон юм.
Мөн хөдөлмөрийн зах зээлийн өөрчлөлт, залуучуудын хөдөлмөр эрхлэлтийн тэргүүлэх чиглэл, ногоон эдийн засагт шилжих үйл явцын хүрээнд залуучуудад илүү олон, чанартай ажлын байр бий болгох боломж, тулгамдаж буй асуудлыг хөндөн ярилцав.
Шударга шилжилтийг хангаж, нүүрстөрөгч багатай, тогтвортой эдийн засагт шилжих үйл явц нь ажилтан, аж ахуйн нэгж байгууллагуудад шинэ боломж бий болгож, хэнийг ч орхигдуулахгүй байхад нийгмийн түншлэл, гурван талт хамтын ажиллагаа чухал болохыг хэлэлцүүлгээр онцлов.
Түүнчлэн залуучуудыг шинээр бий болж буй ногоон ажлын байранд шаардлагатай ур чадвараар хангаж, зохистой хөдөлмөр эрхлэлтэд шилжихэд нь дэмжлэг үзүүлж, Монгол Улсын шударга шилжилтийн үйл явцад тэдний оролцоог бүх талаар хангах нь чухал болохыг талууд санал нэгтэй тэмдэглэлээ.
