МОНГОЛ БРЭНДҮҮД ЭРЭЭН ХОТЫН ОЛОН УЛСЫН ҮЗЭСГЭЛЭНД ЭХ ОРНОО ТӨЛӨӨЛӨН ОРОЛЦОЖ БАЙНА
Жил бүр уламжлал болгон зохион байгуулагддаг "Эрээн хотын олон улсын худалдаа, хөрөнгө оруулалтын чуулга уулзалт, үзэсгэлэн худалдаа" энэ сарын 15-наас 23-ны өдрүүдэд Эрээн хотын Олон улсын үзэсгэлэнгийн төвд амжилттай зохион байгуулагдаж байна.
Бүс нутгийн эдийн засгийн хамтын ажиллагааг нэмэгдүүлж, бизнесийн шинэ боломжуудыг нээж өгдөг тус арга хэмжээнд Монголын Үндэсний Худалдаа Аж Үйлдвэрийн Танхимын зүгээс онцгой ач холбогдол өгч, эх орныхоо экспортлогч баялаг бүтээгчдийг нэгтгэн өргөн бүрэлдэхүүнтэйгээр оролцож байна.
Энэ удаагийн үзэсгэлэнд МҮХАҮТ-ын зүгээс үндэсний үйлдвэрлэгчдийнхээ экспортыг дэмжих, олон улсын зах зээлд өрсөлдөх гарцыг нэмэгдүүлэх зорилгоор 30 орчим баялаг бүтээгч, дотоодын аж ахуйн нэгжийг нэгтгэн, зохион байгуулалттайгаар оролцуулж байгаа юм.
Эдгээр аж ахуйн нэгжүүд нь Монгол хүний уран гар, ухаан бодлоор бүтсэн чанартай бүтээгдэхүүнүүдийг олон улсын худалдан авагчдад танилцуулж байна. Дэлхийд гайхагддаг тансаг ноос, ноолууран эдлэл, монгол өв соёлын давтагдашгүй хэв шинжийг шингээсэн дээл хувцас, нарийн уран хийцтэй гар урлал, чанартай арьс ширэн гутал, цүнхнээс эхлээд эх орны цэвэр байгалийн орцтой гоо сайхны бүтээгдэхүүнүүд гадаадын зочид, хөрөнгө оруулагчдын анхаарлыг ихэд татаж байна.
Танхимын зүгээс үндэсний үйлдвэрлэгчдийнхээ дэлхийн зах зээлд өрсөлдөх чадварыг дээшлүүлэх, экспортлох гарцыг нэмэгдүүлэх, гадаадын томоохон хөрөнгө оруулагчид болон худалдан авагчидтай шууд хамтын ажиллагаа тогтооход нь бодит дэмжлэг үзүүлэн ажиллаж байна.
Энэхүү олон улсын томоохон цугларалт нь монгол брэндүүдийг дэлхийн тавцанд сурталчлан таниулахаас гадна бүс нутгийн худалдааны эргэлтийг шинэ түвшинд гаргах чухал түлхэц болж байна.
