ЭМЭГТЭЙЧҮҮДИЙН МАНЛАЙЛАЛ - ЦӨЛЖИЛТТЭЙ ТЭМЦЭХ ШИНЭ ХӨДӨЛГҮҮР
Нэгдсэн Үндэстний Байгууллагын Цөлжилттэй тэмцэх конвенцын Талуудын 17 дугаар бага хурал (UNCCD COP17)-ын хүрээнд МҮХАҮТ-аас “ESG, тогтвортой санхүүжилт, дижитал инновациар дамжуулан эмэгтэйчүүд газрын доройтлыг бууруулах үйлсэд оролцох нь” сэдэвт салбар хуралдааныг “Ногоон бүс”-д амжилттай зохион байгууллаа.
Уг арга хэмжээг нээж МҮХАҮТ-ын Ерөнхийлөгч Б.Лхагважав хэлсэн үгэндээ, нүүдлийн ахуй болон малчдын нүүх бололцоог чөлөөтэй байлгах нь газрын эвдрэл, цөлжилтөөс хамгаалах гол амин сүнс бөгөөд Үндсэн хуульд малчин өрхийн аж ахуйг оруулснаар мал, малчин хоёрыг хамгаалах институцийг бүрдүүлэх ёстойг онцоллоо. Мөн хөрс, газрыг нөхөн сэргээх хөрөнгө оруулалт нь ирээдүйн эдийн засаг, бизнесийн тогтвортой байдалд хийж буй хөрөнгө оруулалт болохыг дурдаад, ESG стандарт болон бонд нь ердөө тайлан гаргах төдий зүйл биш, эрсдэлийг бууруулж өрсөлдөх чадварыг дээшлүүлэх хэрэгсэл тул эмэгтэй бизнес эрхлэгчдийг дэмжих, тэдний тогтвортой байдал болон экспортын чадавхийг хөгжүүлэхэд чухал ач холбогдолтойг тэмдэглэв.
Үргэлжлүүлэн МҮХАҮТ-ын Ерөнхий нарийн бичгийн дарга Б.Саруул үндсэн илтгэл тавьж, танхимаас тогтвортой хөгжлийн чиглэлээр хэрэгжүүлж буй санал санаачилгууд болон эмэгтэй бизнес эрхлэгчдийг дэмжих бодлогын хэрэгжилтийг танилцууллаа.
Арга хэмжээний эхний панел хэлэлцүүлгийг МҮХАҮТ-ын Ерөнхий нарийн бичгийн дарга Б.Саруул чиглүүлж, эмэгтэйчүүдийн удирдсан бизнест тогтвортой санхүүжилтийг хэрхэн хүртээмжтэй олгох, ногоон хөрөнгө оруулалтын механизм болон экспортын чадавхийг нэмэгдүүлэх боломжуудыг хөндөн ярилцав.
Энэхүү хэлэлцүүлэгт Голомт банкны Олон улсын банкны газрын захирал Б.Энхзаяа банк, санхүүгийн салбараас ногоон болон тогтвортой санхүүжилтийг дэмжих бодлого, эмэгтэй бизнес эрхлэгчдэд зориулсан уян хатан санхүүгийн боломжуудыг хуваалцсан бол "Ханбогд Кашмер" ХХК-ийн Гүйцэтгэх захирал Ч.Ганцэцэг ноос, ноолуурын салбарт
тогтвортой үйлдвэрлэл болон бэлтгэн нийлүүлэлтийн сүлжээний хариуцлагыг нэвтрүүлж буй туршлагаасаа ярилаа.
Мөн "KITE Mongolia" ХХК-ийн үүсгэн байгуулагч, МҮХАҮТ-ын дэргэдэх Бизнес эрхлэгч эмэгтэйчүүдийн зөвлөлийн Удирдах зөвлөлийн гишүүн Л.Болормаа ногоон стартап болон эмэгтэйчүүдийн үүсгэн байгуулсан инновацийн төслүүдэд хөрөнгө оруулалт татах, чадавхижуулах боломжуудыг тодотгов.
Дараагийн хэлэлцүүлгийг МҮХАҮТ-ын Ерөнхийлөгчийн зөвлөх М.Сарандаваа чиглүүлж, Байгаль орчин, нийгэм, засаглалын (ESG) зарчмууд нь бизнесийн тогтвортой хөгжлийн хөдөлгүүр болох тухай өрнүүлсэн юм.
Хэлэлцүүлгийн үеэр "Промон Трейд" ХХК-ийн үүсгэн байгуулагч Н.Оюунбат бизнесийн байгууллагууд байгаль орчинд үзүүлэх сөрөг нөлөөллийг багасгах, нийгмийн хариуцлагыг өдөр тутмын үйл ажиллагаандаа хэрхэн нэвтрүүлж буй жишээг дурдсан бол "Ресилиенси Консалтинг Сервис" ХХК-ийн Гүйцэтгэх захирал Ц.Нямгарав компаниуд ESG-ийн
үнэлгээ хийлгэснээр эрсдэлийг бууруулж, олон улсын зах зээлд өрсөлдөх чадвараа дээшлүүлэх боломжтойг тайлбарлав.
Түүнчлэн Олон улсын хөдөлмөрийн байгууллага (ОУХБ)-ын Байгаль орчин, зохистой хөдөлмөрийн ахлах мэргэжилтэн Фреди Гуаякан уур амьсгалын өөрчлөлтөд дасан зохицох ногоон шилжилтийн үед зохистой хөдөлмөр эрхлэлт болон олон улсын стандартыг хангаж ажиллахын чухлыг онцоллоо.
Арга хэмжээний төгсгөлд “Цахим эдийн засаг дахь эмэгтэй экспортлогчдыг дэмжих WEIDE” төсөлд шалгарч, монгол хүний ур ухаан, бог малын өгөөжөөр хүүхдийн тав тухыг хангасан 100% цэвэр ноос, ноолууран бүтээгдэхүүнийг байгальд ээлтэй, хаягдалгүй үйлдвэрлэн олон улсын зах зээлд нийлүүлж буй "BOG Brand"-ийн үүсгэн байгуулагч Г.Нямдаваа өөрийн бизнесийн амжилттай түүх, уламжлалт гар урлалыг тогтвортой хөгжилтэй хослуулан өөрчлөлтийг манлайлж буй туршлагаасаа хуваалцаж чуулганыг өндөрлүүллээ.
