МҮХАҮТ-ЫН УДИРДЛАГУУД UNCCD COP17-ИЙН “НОГООН БҮС”-ИЙН ҮЙЛ АЖИЛЛАГАА БОЛОН ДОТООДЫН ААН-ҮҮДИЙН ҮЗЭСГЭЛЭНТЭЙ ТАНИЛЦЛАА
НҮБ-ын Цөлжилттэй тэмцэх конвенцын Талуудын 17 дугаар бага хурал (UNCCD COP17) Улаанбаатар хотноо “Эх байгалиа сэргээе. Итгэл найдвараа бадраая” уриан дор эхэлж, дэлхийн 197 улсын төлөөлөгчид, хувийн хэвшил, олон улсын байгууллагын зочид нэгэн дор хуран цуглараад байна.
Энэхүү хурлыг тохиолдуулан олон нийт болон бизнес эрхлэгчдэд зориулан нээлттэй зохион байгуулан ажиллаж буй "Ногоон бүс" (Green Zone)-ийн үйл ажиллагаатай МҮХАҮТ-ын Гүйцэтгэх захирал Ц.Магнайбаатар, Дэд захирал Ч.Баттулга нар танилцлаа.
МҮХАҮТ-ын удирдлагууд Ногоон бүсэд тусгайлан зассан МҮХАҮТ-ын А2 асар болон WEIDE-ийн №37, ITDM C7 асруудаар зочилж, үндэсний үйлдвэрлэгчдийн эко шийдэл, эмэгтэй бизнес эрхлэгчдийн органик бүтээгдэхүүн, тэдгээрийг олон улсын зах зээлд экспортлох боломжуудтай биечлэн танилцсан юм.
Энэхүү үйл ажиллагааны үеэр МҮХАҮТ-ын Гүйцэтгэх захирал Ц.Магнайбаатар "COP17 бага хурал нь манай дотоодын бизнес эрхлэгчдийн хувьд дэлхийн зах зээлд өөрсдийн эко шийдэл, инновацыг танилцуулах түүхэн том боломж болж байна. МҮХАҮТ-ын хувьд үндэсний үйлдвэрлэгчид болон эмэгтэй бизнес эрхлэгчдийнхээ бүтээгдэхүүн, үйлчилгээг олон улсын түвшинд гаргахад бүх талын дэмжлэг үзүүлэн ажиллах болно" хэмээн онцоллоо.
Мөн МҮХАҮТ-ын Дэд захирал Ч.Баттулга "Ногоон бүсэд дэлгэгдсэн ААН-үүдийн үзэсгэлэнгээс манай хувийн хэвшлийнхэн тогтвортой хөгжил, байгаль орчинд ээлтэй үйлдвэрлэлийн стандартыг хэдийн нэвтрүүлж эхэлснийг харж болно. Олон улсын 'Business4Land' санаачилга болон ногоон санхүүжилтийн механизмуудад хамрагдсанаар манай бизнесүүд дэлхийн сүлжээнд нэгдэх том үүд хаалга нээгдэж байна" гэв.
COP17 бага хурлаас цөлжилт, газрын доройтол, ган гачигтай холбоотой шийдвэрлэх бодлогын томоохон шийдвэрүүд гарах бөгөөд конвенцын гишүүн 197 улс тэдгээрийг дагаж мөрдөн, үндэсний хөтөлбөртөө тусган хэрэгжүүлэх үүрэг хүлээх юм. Тус хурлын үр дүнд манай улсын хувийн хэвшлийнхэн олон улсын "Business4Land" санаачилга болон ногоон төслүүдийн санхүүжилтэд хамрагдаж, тогтвортой үйлдвэрлэлийн стандартыг нэвтрүүлэн дэлхийн сүлжээнд нэгдэх өндөр ач холбогдолтой.
Иймд иргэд, олон улсын зочид болон бизнес эрхлэгч та бүхнийг COP17-ийн Ногоон бүсэд хүрэлцэн ирж, МҮХАҮТ-ын А2 болон WEIDE-ийн №37, ITDM С7 асарт зочлон Монголын бизнесийн салбарын ололт амжилт, эмэгтэй бизнес эрхлэгчдийн бүтээгдэхүүн болон экспортын шинэ боломжуудтай танилцахыг урьж байна.
