АЗИЙН ХӨГЖЛИЙН БАНКНЫ ТӨЛӨӨЛӨГЧИДТЭЙ УУЛЗАЛТ ХИЙЛЭЭ
Монгол Улсад ирэх таван жилийн хугацаанд хэрэгжүүлэх техник, мэргэжлийн боловсролын төслийн хүрээнд Монголын Үндэсний Худалдаа Аж Үйлдвэрийн Танхим (МҮХАҮТ) болон Азийн хөгжлийн банкны төлөөлөгчид уулзалт хийж, хамтын ажиллагааны боломж, төслийн хэрэгжилтийн талаар санал солилцлоо.
Уулзалтад Азийн хөгжлийн банкны Нийгмийн салбар хариуцсан ахлах мэргэжилтэн (Principal Social Sector Officer) Шин Лонг тэргүүтэй төслийн багийн төлөөлөл оролцож, Монгол Улсад хэрэгжүүлэхээр төлөвлөж буй техник, мэргэжлийн боловсрол, сургалтын салбарын төслийн талаар танилцууллаа.
Уулзалтын үеэр мэргэжлийн болон техникийн боловсрол, сургалтын чанар, хүртээмжийг сайжруулах, хөдөлмөрийн зах зээлийн эрэлт хэрэгцээнд нийцсэн мэргэжилтэй ажиллах хүчнийг бэлтгэх, боловсролын салбар болон бизнесийн байгууллагуудын хамтын ажиллагааг өргөжүүлэх чиглэлээр санал солилцов.
Уулзалтад МҮХАҮТ-ын Гүйцэтгэх захирал Ц.Магнайбаатар, Бизнес академийн дарга Д.Бямбадорж нар оролцож цаашдын хамтын ажиллагааны талаар санал солилцлоо.
Мөн энэхүү уулзалтад Азийн хөгжлийн банкны төлөөлөгчдөөс гадна TVET-ийн зөвлөх, хөдөө аж ахуйн машин механизмын зөвлөх, AARC International Consulting Co-ийн дэд захирал болон боловсрол, нийгмийн салбарын мэргэжилтнүүд оролцсон юм.
Энэхүү уулзалт нь Монгол Улсын мэргэжлийн болон техникийн боловсролын салбарыг хөгжүүлэх, бизнесийн салбарын оролцоог нэмэгдүүлэх, хөдөлмөрийн зах зээлийн эрэлтэд нийцсэн хүний нөөцийг бэлтгэх чиглэлээр олон улсын байгууллагатай хамтын ажиллагааг өргөжүүлэх чухал алхам боллоо.
