Монгол-Польшийн бизнес уулзалт амжилттай зохион байгуулагдлаа
Монголын Үндэсний Худалдаа, Аж Үйлдвэрийн Танхим (МҮХАҮТ) болон Польшийн Хөрөнгө Оруулалт, Худалдааны Агентлагийн хамтран зохион байгуулсан Монгол-Польшийн бизнес уулзалт амжилттай боллоо.
Арга хэмжээнд Бүгд Найрамдах Польш Улсын Кротошин хотын Захиргааны Олон улсын харилцааны зохицуулагч хатагтай Катаржина Гробельнагаар ахлуулсан Польшийн тариа, хүнсний ногооны үр үржүүлэг, саалийн үнээний эрчимжсэн аж ахуй, ургамал хамгаалал, ХАА-н тоног төхөөрөмжийн сэлбэг, автобаз удирдлага зэрэг салбарын бизнесийн төлөөлөгчид, Монголын аж ахуйн нэгж, байгууллагуудын төлөөлөл өргөн бүрэлдэхүүнтэй оролцов.
Нээлтийн үеэр МҮХАҮТ-ын Гүйцэтгэх захирал Ц.Магнайбаатар, Ерөнхий нарийн бичгийн дарга Б.Саруул нар Монгол, Польшийн худалдаа, эдийн засгийн хамтын ажиллагааг өргөжүүлэх, бизнесийн түншлэлийг бэхжүүлэхийн ач холбогдлыг онцолж, хоёр улсын аж ахуйн нэгжүүдийн хамтын ажиллагааг бодит төсөл, хөрөнгө оруулалтаар баяжуулах, GSP+ тарифын хөнгөлөлтийн ерөнхий системийг ашиглан худалдааг нэмэгдүүлэх өргөн боломж байгааг тэмдэглэлээ.
Мөн Монгол Улсын урт хугацааны хөгжлийн бодлого, хөрөнгө оруулалтын орчны шинэчлэлийн хүрээнд Польшийн туршлага, технологи, хөрөнгө оруулалт хоёр улсын эдийн засгийн хамтын ажиллагаанд бодит хувь нэмэр оруулахыг онцлов.
МҮХАҮТ цаашид Кротошин хотын Захиргаа болон Польшийн байгууллагуудтай хамтын ажиллагаагаа өргөжүүлж, бизнес эрхлэгчдийн харилцаа холбоо, мэдээлэл солилцоо, хамтарсан төсөл, хөрөнгө оруулалтыг дэмжин ажиллахаа илэрхийллээ.
Арга хэмжээнд Польшийн бизнесийн төлөөллөөс Blending LLC-ийн Итгэмжлэгдсэн төлөөлөгч Радослав Людзиш (Radosław Ludzis), HR Smolice LLC-ийн Удирдах зөвлөлийн гишүүн Францишек Маршалек (Franciszek Marszałek), A2HM LLC-ийн Гүйцэтгэх захирал Матеуш Гжегорски (Mateusz Grzegorski), сүүний аж ахуйн эзэн Мачей Поль (Maciej Pohl), сүү, гахайн аж ахуйн эзэн Марек Осух (Marek Osuch), Poznańska Hodowla Roślin LLC-ийн Гадаад худалдаа эрхэлсэн захирал Влодзимеж Латышев (Włodzimierz Łatyszew) нар оролцож, Монголын бизнес эрхлэгчидтэй хамтын ажиллагааны боломжийн талаар санал солилцлоо.
