УИХ-ААС ИРҮҮЛСЭН ХАРИУ
ХАМТЫН АЖИЛЛАГААНЫ ХҮРЭЭНД ХЭРЭГЖСЭН ХУУЛЬ ЭРХ ЗҮЙН ШИНЭЧЛЭЛ
УИХ-ын Тамгын газар, Монголын Үндэсний Худалдаа Аж Үйлдвэрийн Танхим хооронд 2017 оны 02 дугаар сарын 17-ны өдөр бизнесийн хууль эрх зүйн таатай орчныг бүрдүүлэхэд хамтран ажиллах тухай Хамтын ажиллагааны санамж бичиг байгуулсан билээ. Санамж бичгийн хүрээнд шат дараатай үйл ажиллагааг зохион байгуулж ирсэн бөгөөд өнгөрөгч 05 дугаар сарын 27-ны өдөр УИХ-ын дарга С.Бямбацогт МҮХАҮТ-ын Удирдах зөвлөл, бизнес эрхлэгчид, хувийн хэвшлийн төлөөлөлтэй уулзалт зохион байгуулсан. Уулзалтын үеэр бизнесийн салбарын өнөөгийн нөхцөл байдал, тулгамдаж буй асуудал, хууль эрх зүйн орчны шинэчлэлийн хэрэгцээ, шаардлагын талаар санал солилцож, ажил хэрэгч хэлэлцүүлэг өрнүүлсэн. МҮХАҮТ уулзалтын үеэр бизнес эрхлэгчдээс гаргасан санал хүсэлтийг нэгтгэн үндсэн гурван чиглэл бүхий асуудлыг тусгасан албан бичгийг УИХ-ын даргад хүргүүлсний дагуу УИХ-ын дарга С.Бямбацогт бизнесийн хууль эрх зүйн хүрээнд хийгдсэн шинэчлэлийн талаарх мэдээллийг ирүүлэв. УИХ-ын 2026 оны хаврын ээлжит чуулганаар нийгэм эдийн засаг, иргэдийн амьдралд тулгамдсан, олон жил шийдэгдэж чадахгүй байсан нэн чухал хууль тогтоомжуудыг хэлэлцэн баталсны дотор бизнес эрхлэх, хөрөнгө оруулалтын орчныг сайжруулах, эдийн засгийн эрх чөлөөг бэхжүүлэхэд чиглэсэн Эдийн засгийн эрх чөлөөний тухай хууль болон холбогдох хууль тогтоомжийн өөрчлөлтүүд, бизнес эрхлэгчдийг дэмжих, иргэдийн оролцоог хамгаалах Татварын багц хууль, ажил олгогчийн ачааллыг бууруулж, нийгмийн хамгааллыг сайжруулах Нийгмийн даатгалын багц хуулийн нэмэлт, өөрчлөлтүүдийг баталсан. Ингэснээр МҮХАҮТ-аас хүргүүлсэн санал хүсэлтийн тодорхой хэсэг хууль эрх зүйн шийдэлд тусгалаа олж, эхний үр дүн гарч эхлээд байна. Улсын эдийн засгийн өсөлт, хөгжилд үнэтэй хувь нэмэр оруулж, баялаг бүтээж буй хувийн хэвшлийн бизнес эрхлэгчдийн өмнө тулгамдаж буй асуудлыг шийдвэрлэж, чөлөөт эдийн засгийн суурийг бэхжүүлэхэд чиглэсэн хууль эрх зүйн эдгээр шинэчлэлүүд бизнес эрхлэгчдийн үйл ажиллагаанд тодорхой дэмжлэг болно гэдэгт итгэж байна.
