МҮХАҮТ болон БНХАУ-ын Өвөр Монголын Зөвлөл хамтран "Монгол Улс, БНХАУ-ын бүс нутгийн эдийн засаг, хамтын ажиллагааны уулзалт"-ыг зохион байгууллаа
Монголын Үндэсний Худалдаа Аж Үйлдвэрийн Танхим (МҮХАҮТ) болон Монгол Улс дахь Өвөр Монголын Зөвлөл хамтран зохион байгуулсан "Монгол Улс, БНХАУ-ын бүс нутгийн эдийн засаг, хамтын ажиллагааны уулзалтыг зохион байгууллаа.
Энэхүү уулзалтад хоёр талын 30 гаруй төлөөлөгч оролцсоноос БНХАУ-ын Өвөр Монголын Өөртөө Засах Орны Шилийнгол аймгаас хүнс, хөдөө аж ахуй, хүнд машин механизм, тоног төхөөрөмжийн салбарын аж ахуйн нэгжүүд хүрэлцэн ирсэн бол Монголын талаас банк, санхүү, сүүн бүтээгдэхүүний үйлдвэрлэл, төмөр боловсруулах салбар болон жижиг, дунд үйлдвэрийг дэмжих байгууллагуудын төлөөлөл оролцож, хамтын ажиллагаагаа өргөжүүлэх боломжуудыг хэлэлцсэн юм.
Арга хэмжээг МҮХАҮТ-ын Гүйцэтгэх захирал Ц.Магнайбаатар болон Шилийнгол аймгийн Засаг даргын орлогч Чао Лу нар нээж үг хэлэхдээ хоёр улсын уламжлалт найрсаг харилцаа, эдийн засгийн хамтын ажиллагаа тогтвортой өргөжин хөгжиж буйг онцлон тэмдэглэлээ. Түүнчлэн Шилийнгол аймаг нь Монгол Улстай газарзүйн хувьд ойр, байгаль цаг уурын болон нүүдлийн мал аж ахуй эрхлэх нийтлэг уламжлалтайг дурдаж, малын үүлдэр угсааг сайжруулах, мал эмнэлэг, тэжээл, мах, сүү, хөдөө аж ахуйн бүтээгдэхүүний боловсруулалт, орчин үеийн техник технологи нэвтрүүлэх болон хөрөнгө оруулалт, худалдааны чиглэлээр хамтран ажиллах өргөн боломж байгааг онцоллоо.
Уулзалтын үеэр Бээжин И Шюэ Жя Лун Импорт Экспортын Худалдааны ХХК, Өвөр Монголын Сундалай Хүнсний ХХК, Өвөр Монголын Мэншү Шитун Технологийн ХХК, Өвөр Монголын Шинь Малачин Хөдөө аж ахуй, Мал аж ахуйн технологийн ХХК, Өвөр Монголын Даруй Хуучин автомашины арилжааны зах ХХК зэрэг таван компанияас үйл ажиллагаа болон хамтран ажиллах боломжуудаа танилцуулсан юм.
Арга хэмжээний төгсгөлд B2B буюу хоёр талын аж ахуйн нэгжүүдийн бизнес уулзалт өрнөж, оролцогчид цаашдын хамтын ажиллагааны чиглэлээ тодорхойлсноор энэ удаагийн хэлэлцүүлэг амжилттай өндөрлөлөө.
