МҮХАҮТ ШИНЭЭР ЭЛССЭН ГИШҮҮДДЭЭ ГИШҮҮНЧЛЭЛИЙН ГЭРЧИЛГЭЭ ГАРДУУЛЖ, БИЗНЕСИЙН ХАМТЫН АЖИЛЛАГААНЫ ШИНЭ БОЛОМЖУУДЫГ НЭЭЛЭЭ

2026/07/03 0

Монголын Үндэсний Худалдаа Аж Үйлдвэрийн Танхим (МҮХАҮТ) шинээр элссэн гишүүн байгууллагууддаа зориулсан "Member Care Event" арга хэмжээг амжилттай зохион байгуулж, гишүүнчлэлийн гэрчилгээг нь албан ёсоор гардууллаа.

Арга хэмжээг МҮХАҮТ-ын Гүйцэтгэх захирал Ц.Магнайбаатар нээж, танхимын үйл ажиллагаа, гишүүдэд чиглэсэн үйлчилгээ болон бизнесийн хамтын ажиллагааг өргөжүүлэх зорилтуудыг танилцуулсан юм.

Энэхүү арга хэмжээ нь зөвхөн гэрчилгээ гардуулах ёслол бус, шинэ гишүүдийг МҮХАҮТ-ын үйл ажиллагаа, үйлчилгээ, бизнесийн хамтын ажиллагааны боломжуудтай танилцуулах, харилцан холбоо тогтоох, хамтын өсөлтийг дэмжих зорилготой байв.

Арга хэмжээний үеэр оролцогчдод "2026–2027: Эдийн засгийн хүлээлт" болон "Хиймэл оюун ухааныг санхүү, нягтлан бодох бүртгэлд үр дүнтэй ашиглах нь" сэдэвт илтгэлүүдийг хүргэж, бизнесийн орчны ирээдүйн чиг хандлага болон технологийн шийдлүүдийн талаар бодит мэдээлэл, практик зөвлөмжийг хуваалцлаа.

Мөн арга хэмжээний хүрээнд зохион байгуулагдсан Quiz Night хөгжөөнт тэмцээн оролцогчдын дунд идэвхтэй, нээлттэй уур амьсгал бүрдүүлсэн бол "Women Owned" тохирлын гэрчилгээ гардуулах ёслол эмэгтэй бизнес эрхлэгчдийг дэмжих бодлогын нэг илэрхийлэл болж өнгөрөв.

Шинээр элссэн гишүүн байгууллагуудад гишүүнчлэлийн гэрчилгээг МҮХАҮТ-ын Дэд захирал Ч.Баттулга гардуулан өгсөн бөгөөд энэ үеэр олон салбарын бизнес эрхлэгчид B2B Networking уулзалтаар харилцан танилцаж, бүтээгдэхүүн үйлчилгээ болон хамтын ажиллагааны шинэ боломжуудаа нээлээ.

Өнөөдөр бизнесийн үнэ цэнэ зөвхөн бүтээгдэхүүн, үйлчилгээнээс гадна мэдлэг, харилцаа холбоо, хамтын ажиллагааны сүлжээгээр тодорхойлогдож байна. "Member Care Event" нь энэ бүх боломжийг нэг дор бүрдүүлж, шинээр элссэн гишүүдийг МҮХАҮТ-ын бизнесийн экосистемтэй холбосон онцлох арга хэмжээ боллоо.