АЖ ҮЙЛДВЭРИЙН САЛБАРЫН ИРЭЭДҮЙГ ТОДОРХОЙЛОХ “ITP FORUM-2026” ЗОХИОН БАЙГУУЛАГДЛАА
Монгол улсын эдийн засгийн голлох тулгуур салбарын хөгжлийг хурдасгах, тулгамдсан асуудлуудыг шийдвэрлэх зорилготой “Аж үйлдвэржилтийг ЧӨЛӨӨЛЬЕ” уриатай ITP FORUM-2026 амжилттай зохион байгуулагдлаа. Тус форумын ерөнхий зохион байгуулагчаар “Эрдэнэс ҮТП” ХХК ажилласан бөгөөд Аж үйлдвэр, эрдэс баялгийн яам, “Чингис хаан баялгийн сан нэгдэл” ХХК, Монголын Үндэсний худалдаа, аж үйлдвэрийн танхим, Монголын Уул уурхайн үндэсний ассоциаци болон “YES Mongolia” байгууллагууд хамтран ажилласан юм. Форумын үеэр төр, хувийн хэвшил болон мэргэжлийн холбоодын төлөөллүүд салбарын өнөөгийн байдал, цаашдын чиг хандлагын талаар сонирхолтой илтгэл тавьж, хэлэлцүүлэг өрнүүллээ.
МҮХАҮТ-ын Ерөнхийлөгч Б.Лхагважав эрдэс баялгийн салбарын өнөөгийн байдал, бизнес эрхлэгчдэд тулгарч буй голлох сорилт бэрхшээл болон ололт амжилтыг дүгнэн үг хэллээ. Мөн тэрбээр тус салбарыг жинхэнэ утгаар нь "чөлөөлж", хөгжлийг шинэ шатанд гаргахын тулд эрх зүйн орчныг шинэчлэх нь нэн шаардлагатай байгааг онцгойлон тэмдэглэв. “ITP FORUM-2026” нь аж үйлдвэр болон уул уурхайн салбарын либералчлал, хувийн хэвшлийн оролцоог нэмэгдүүлэх, тогтвортой хөгжлийн бодлогыг тодорхойлоход чухал түлхэц үзүүлсэн арга хэмжээ боллоо гэж оролцогчид дүгнэж байна.
