"Цагаан Алт" дэлгүүрт "Mongolian Green Labels" (MGL) салбар дэлгүүр албан ёсоор үүдээ нээлээ. Нээлтийн үйл ажиллагаанд ЕХ-оос Тайланд Улсад суугаа Төлөөлөгчийн газрын Бүс нутгийн хамтын ажиллагааны газрын дарга Том Кори, МҮХАҮТ-ын Ерөнхий нарийн бичгийн дарга Б.Саруул, Европын Холбооны санхүүжилттэй ITDM төслийн зөвлөх Карл Круг нарын хүндэт зочид оролцон үг хэлж, баярын мэндчилгээ дэвшүүлсэн юм. Энэхүү үйл явдал нь Монголын аялал жуулчлалын оргил үе болон Үндэсний их баяр наадмын өмнөхөн тохиож байгаагаараа туйлын оновчтой, ач холбогдолтой цаг үеэ олсон алхам болж байна.

Европын Холбооны санхүүжилттэй, Гадаад худалдааг дэмжих ITDM төслийн хүрээнд байгуулагдсан энэхүү дэлгүүр нь Монголын жижиг, дунд үйлдвэрлэгчид, нэхмэл, арьс шир, гоо сайхны кластеруудын хувьд борлуулалтаа шууд тэтгэх бодит дэмжлэг болж байна.

Байгальд ээлтэй, нүүдлийн мал аж ахуйн тогтвортой тогтолцоонд суурилсан манай үндэсний шилдэг бүтээгдэхүүнүүдийг эх орондоо ирсэн жуулчдад танилцуулаад зогсохгүй, Европын зах зээл болон олон улсын онлайн сүлжээнд зуучлах хамтын ажиллагааны маш том платформ нээгдэж байгаа нь Монголын бизнесийнхэнд дэлхийн жишигт хүрч хөгжих, тогтвортой орлогоо нэмэгдүүлэх түүхэн боломжийг олгож байна.