ГААЛИЙН ТУХАЙ ХУУЛИЙН ШИНЭЧИЛСЭН НАЙРУУЛГЫН ТӨСЛИЙГ БОЛОВСРУУЛАХ АЖЛЫН ХЭСГИЙН ҮЙЛ АЖИЛЛАГААГ АЛБАН ЁСООР ЭХЛҮҮЛЛЭЭ
Гаалийн тухай хуулийн шинэчилсэн найруулгын төслийг боловсруулах ажлын хэсгийн үйл ажиллагааг албан ёсоор эхлүүлэх арга хэмжээ Гаалийн ерөнхий газарт боллоо. Одоогоор мөрдөгдөж буй Гаалийн тухай хууль нь 2008 онд батлагдсанаас хойш 18 жилийн хугацаанд 240 гаруй удаа нэмэлт, өөрчлөлт орсон бөгөөд цаг үеийн хөгжил, эрх зүйн шинэ шаардлагад нийцүүлэн хуулийг иж бүрэн шинэчлэх шаардлага үүсээд байна.
Ажлын хэсэг шинэчилсэн найруулгын төслийг дижитал шилжилт, хиймэл оюун ухаан, цахим худалдааны хөгжлийн чиг хандлагад нийцүүлж, дэлхийн гаалийн шилдэг туршлага, олон улсын стандартад тулгуурлан боловсруулахад голлон анхаарч ажиллах юм.
Нээлтийн арга хэмжээнд Сангийн яам болон холбогдох төрийн байгууллагуудын 30 гаруй төлөөлөл оролцож, хуулийн шинэчлэлийн талаар санал солилцов. Энэ үеэр МҮХАҮТ-ын Гадаад худалдааны бичиг баримт баталгаажуулах газрын дарга Э.Бадамхорол "Цахим гарал үүслийн гэрчилгээний хэрэгжилт", "ГЕГ, МҮХАҮТ хоорондын системийн холболт" сэдвээр илтгэл, мэдээлэл танилцууллаа.
Хуулийн төслийг боловсруулах явцад иргэд, аж ахуйн нэгжүүд болон гадаад худалдаанд оролцогч талуудаас нээлттэйгээр санал авч, төслийн агуулгад тусган ажиллах аж.
