ТӨР, ХУВИЙН ХЭВШЛИЙН ТҮНШЛЭЛИЙГ ШИНЭ ШАТАНД ГАРГАХ ХАМТЫН АЖИЛЛАГААНЫ ЧИГЛЭЛҮҮДИЙГ ТОДОРХОЙЛЛОО
Нийслэлийн Засаг дарга бөгөөд Улаанбаатар хотын захирагч Б.Пүрэвдагва Монголын Үндэсний Худалдаа Аж Үйлдвэрийн Танхимын удирдлагуудтай уулзаж, төр, хувийн хэвшлийн түншлэлийг бэхжүүлэх, бизнес, хөрөнгө оруулалтын таатай орчныг бүрдүүлэх, Улаанбаатар хотын эдийн засгийн өрсөлдөх чадварыг нэмэгдүүлэх чиглэлээр хамтын ажиллагааны асуудлаар санал солилцлоо.
Уулзалтыг нээж хотын дарга Б.Пүрэвдагва “Төр бизнестэй өрсөлдөхгүй, хот бизнес эрхлэхгүй” хэмээн онцолж, төр, хувийн хэвшлийн түншлэлд суурилсан хөгжлийн бодлогоо танилцууллаа. Тэрбээр зөвшөөрөл олголт, хяналт шалгалт, төрийн үйлчилгээний шат дамжлагыг цөөрүүлж, технологид суурилсан шийдлийг нэвтрүүлэх, нийслэлийн өмчит байгууллагуудын Төлөөлөн удирдах зөвлөлд хувийн хэвшлийн төлөөллийг ажиллуулах, хувийн хэвшлийн хэрэгжүүлэх боломжтой ажил, үйлчилгээнд төр өрсөлдөхгүй байх зарчмыг бодлогын түвшинд хэрэгжүүлэхээ илэрхийлэв.
Мөн энэ үеэр нийслэлийн үйл ажиллагаа, төсөл, хөрөнгө оруулалт, үйлчилгээ болон бусад мэдээллийг иргэд, аж ахуйн нэгжүүдэд нээлттэй, ил тод хүргэх зорилготой “Open.Ulaanbaatar.mn” нээлттэй мэдээллийн платформыг ашиглалтад оруулж буйгаа танилцуулж, мэдээллийн хүртээмж, ил тод байдлыг нэмэгдүүлэхэд уг платформ чухал үүрэг гүйцэтгэхийг онцлов.
Уулзалтын хүрээнд Нийслэлийн Засаг даргын Тамгын газар, МҮХАҮТ хамтын ажиллагааны санамж бичиг байгуулж, хөрөнгө оруулалт, худалдаа, үйлдвэрлэл, экспорт, аялал жуулчлалыг дэмжих, бизнесийн орчныг сайжруулахад чиглэсэн үзэсгэлэн, форум, бизнесийн арга хэмжээ, сургалт, судалгаа, зөвлөх үйлчилгээ зэрэг Танхимын бүтээгдэхүүн, үйлчилгээг хамтран хэрэгжүүлэх чиглэлээр санал нэгдэв.
Талууд цаашид бизнес эрхлэхэд тулгамдаж буй асуудлыг тогтмол хамтран хэлэлцэж, хувийн хэвшлийн санал, санаачилгыг бодлого боловсруулах, шийдвэр гаргах үйл явцад тусган ажиллах замаар төр, хувийн хэвшлийн үр дүнтэй түншлэлийг бэхжүүлж, Улаанбаатар хотын эдийн засгийн тогтвортой хөгжил, хөрөнгө оруулалтын орчныг сайжруулах чиглэлд хамтын ажиллагаагаа эрчимжүүлэхээр тохиролцлоо.
