МҮХАҮТ ОЛОН УЛСЫН ГАРАЛ ҮҮСЛИЙН ГЭРЧИЛГЭЭНИЙ ИТГЭМЖЛЭГДСЭН СҮЛЖЭЭНД НЭГДЛЭЭ
Монголын Үндэсний Худалдаа Аж Үйлдвэрийн Танхим (МҮХАҮТ) нь Олон улсын худалдааны танхимын Дэлхийн танхимуудын холбооны Олон улсын гарал үүслийн гэрчилгээний магадлан итгэмжлэлийн сүлжээ болох “ICC WCF CO Accreditation Chain”-д албан ёсоор нэгдэж, тус сүлжээний 43 дахь гишүүн улсын Үндэсний танхим боллоо.
МҮХАҮТ нь энэхүү магадлан итгэмжлэлийн сүлжээнд нэгдсэнээр тус танхимаас олгож буй хөнгөлөлттэй бус гарал үүслийн гэрчилгээ дээр байршуулах Олон улсын худалдааны танхимын “ICC CO Label” шошгыг ашиглах эрхийг хүлээн авсан юм.
Энэхүү үйл явдал нь олон улсын худалдааг хөнгөвчлөх, Монгол Улсын экспортын барааны гарал үүслийн гэрчилгээний найдвартай байдлыг хилийн чанадад бататгах, залилан болон хуурамч баримт бичгээс хамгаалах нөхцөлийг бүрдүүлэхэд чухал ач холбогдолтой.Мөн гаалийн бүрдүүлэлтийн хугацааг бууруулж, цахим гарал үүслийн гэрчилгээний хөгжлийг дэмжихэд томоохон түлхэц болох бөгөөд Олон улсын худалдааны танхимын “Баталгаажуулалтын платформ”-оор дамжуулан дэлхийн аль ч улсын гаалийн байгууллага, худалдааны түншүүд МҮХАҮТ-аас олгосон гарал үүслийн гэрчилгээний хүчин төгөлдөр байдлыг цахимаар шууд шалгах боломж бүрдэж байна.
Олон улсын худалдааны танхимын Дэлхийн танхимуудын холбооны Олон улсын гарал үүслийн гэрчилгээний магадлан итгэмжлэлийн сүлжээ нь гэрчилгээ олгох үйл ажиллагааг олон улсын нэгдсэн стандартын дагуу хэрэгжүүлдэг, дэлхийн 40 гаруй улсын 800 гаруй танхимыг эгнээндээ нэгтгэсэн бөгөөд жил бүр 9 сая гаруй гарал үүслийн гэрчилгээ олгодог дэлхийн хэмжээний тогтолцоо юм. МҮХАҮТ нь Олон Улсын худалдааны танхимын гишүүн байгууллагын хувьд тус танхимын Дэлхийн танхимуудын холбоогоор дамжуулан гаргадаг гарал үүслийн гэрчилгээтэй холбоотой дүрэм, удирдамжийг мөрдлөг болгон ажилладаг.
