МҮХАҮТ ЖИЖИГ, ДУНД БИЗНЕСИЙГ ДЭМЖИХ МОНГОЛЫН САЙН ТУРШЛАГЫГ ОЛОН УЛСАД ТАНИЛЦУУЛЛАА
МҮХАҮТ-ын Ерөнхий нарийн бичгийн дарга Б.Саруул Олон улсын худалдааны төв (ITC)-өөс зохион байгуулсан "Global SME Ministerial" санаачилгын цахим уулзалтад оролцлоо. Энэхүү уулзалтын үеэр тэрээр Монгол Улсад жижиг, дунд бизнес (ЖДҮ) эрхлэгчдийг дэмжих чиглэлээр хэрэгжүүлж буй сайн туршлага, үр дүнтэй санаачилгуудыг олон улсын төлөөлөгчдөд танилцууллаа.
"Global SME Ministerial" санаачилга нь жижиг, дунд бизнесийн хөгжлийг дэлхийн бодлогын түвшинд хэлэлцэх олон улсын хамтын ажиллагааны шинэ талбар бөгөөд анхны "Call to Action" баримт бичгийг нь дэлхийн 60 гаруй улс дэмжин баталж, ЖДҮ-ийн өрсөлдөх чадварыг нэмэгдүүлэх, санхүүгийн хүртээмжийг сайжруулах, дижитал болон ногоон шилжилтийг эрчимжүүлэх чиглэлээр хамтран ажиллахаар тохиролцсон байдаг.
Уг санаачилгын хүрээнд 2027 онд зохион байгуулагдах дараагийн дээд хэмжээний уулзалтын бэлтгэл ажлыг хангах, улс орнуудын шилдэг туршлагыг цуглуулах, харилцан суралцах мэдлэгийн платформыг хөгжүүлэх зорилгоор энэ удаагийн цахим хэлэлцүүлгийг өрнүүлжээ. Уулзалтаар МҮХАҮТ-ын ЕНБДарга Б.Саруул, Монголын ЖДҮ эрхлэгчдийн өрсөлдөх чадварыг дээшлүүлэх чиглэлээр хэрэгжүүлж буй гурван гол тулгуурыг онцлон танилцуулсан юм. Үүнд, ЖДҮ эрхлэгчдийн санхүүжилтийг нэмэгдүүлэх, хөрөнгө оруулалт татах чадавхыг бэхжүүлэх чиглэлээр хийгдэж буй ажлуудыг дурдсанаас гадна экспортын дижитал хэрэгслүүд, цахим худалдаа, бизнесийн мэдээллийн платформ болон чадавх бэхжүүлэх сургалтуудыг багтаасан дижитал шилжилтийн үйл ажиллагааг танилцууллаа. Мөн тогтвортой үйлдвэрлэл, ESG зарчим, ногоон санхүүжилт болон олон улсын стандартыг нэвтрүүлэх төсөл, хөтөлбөрүүдийг хэрэгжүүлж байгааг тэмдэглэв.
Бодлогын нөлөөллийн явц, Швейцарын туршлага болон худалдааг дэмжих байгууллагуудын үүргийг хэлэлцсэн тус цахим уулзалтад Монгол Улсаас гадна Бангладеш, Эсватини улсын төлөөлөгчид оролцож, өөрсдийн шинэлэг санаачилгуудаа хуваалцсан байна. Танхимаас танилцуулсан туршлага нь Монголын жижиг, дунд бизнесүүдийн бодит ажлыг олон улсын түвшинд сурталчлахын зэрэгцээ дэлхийн шилдэг туршлагаас суралцах чухал боломжийг бүрдүүллээ. Цаашид МҮХАҮТ нь ITC болон олон улсын түнш байгууллагуудтай хамтын ажиллагаагаа улам өргөжүүлж, дотоодын бизнесүүдийн экспортын чадавхыг бэхжүүлэх, олон улсын худалдаанд оролцох боломжийг нэмэгдүүлэх, тогтвортой хөгжлийг дэмжих чиглэлээр идэвхтэй хамтран ажиллахаа илэрхийлэв.
