МҮХАҮТ-ЫН ЕРӨНХИЙЛӨГЧ Б.ЛХАГВАЖАВ ГУАНДУН МУЖИЙН ХӨРӨНГӨ ОРУУЛАЛТЫН ОРЧНЫГ ТАНИЛЦУУЛАХ УУЛЗАЛТАД ОРОЛЦЛОО
БНХАУ-ын Бээжин хотноо 2026 оны 6 дугаар сарын 22-ны өдөр Олон улсын ханган нийлүүлэлтийн сүлжээний IV удаагийн экспогийн хүрээнд зохион байгуулагдсан “2026 онд Гуандунд хөрөнгө оруулах боломж” сэдэвт хөрөнгө оруулалт, хамтын ажиллагааг сурталчлах уулзалтад Монголын Үндэсний Худалдаа Аж Үйлдвэрийн Танхимын Ерөнхийлөгч Б.Лхагважав зочноор оролцлоо.
Тус арга хэмжээг Гуандун мужийн Ардын Засгийн газар болон холбогдох байгууллагууд хамтран зохион байгуулж, тус мужийн эдийн засаг, худалдаа, хөрөнгө оруулалтын орчин, аж үйлдвэрийн хөгжлийн бодлого, олон улсын хамтын ажиллагааны боломжуудыг гадаадын төр, бизнесийн байгууллагуудын төлөөлөлд танилцуулсан юм. Арга хэмжээний үеэр Гуандун мужийн удирдлагууд тус бүс нутаг нь БНХАУ-ын эдийн засгийн хамгийн эрчимтэй хөгжиж буй төвүүдийн нэг бөгөөд өндөр технологи, ухаалаг үйлдвэрлэл, цахилгаан автомашин, дижитал эдийн засаг, логистик болон ногоон хөгжлийн салбаруудад хөрөнгө оруулалт татах өргөн боломжтойг онцлон тэмдэглэв. Мөн олон улсын үйлдвэрлэл, ханган нийлүүлэлтийн сүлжээний хамтын ажиллагааг өргөжүүлэх, гадаадын хөрөнгө оруулалтыг дэмжих бодлого, хэрэгжүүлж буй томоохон төсөл хөтөлбөрүүдээ танилцууллаа.
Уулзалтын үеэр Монголын Үндэсний Худалдаа Аж Үйлдвэрийн Танхимын Ерөнхийлөгч Б.Лхагважавыг БНХАУ-ын Олон улсын худалдааг дэмжих зөвлөлийн (CCPIT) Гуандун мужийн хорооны удирдлагууд хүлээн авч уулзан, Монгол Улс, БНХАУ-ын худалдаа, хөрөнгө оруулалтын хамтын ажиллагааг өргөжүүлэх, бизнес эрхлэгчдийн харилцаа холбоог идэвхжүүлэх, хоёр улсын аж ахуйн нэгжүүдийн хамтын ажиллагааг шинэ түвшинд хүргэх асуудлаар санал солилцов. Түүнчлэн уул уурхай, хөдөө ахуй, хүнс боловсруулах үйлдвэрлэл, ноос ноолуур, логистик болон ханган нийлүүлэлтийн сүлжээний чиглэлээр хамтран ажиллах боломжуудын талаар дэлгэрэнгүй хэлэлцэж, харилцан ашигтай хамтын ажиллагааны шинэ чиглэлүүдийг тодорхойлсон юм.
Монголын талын идэвхтэй оролцоо нь Гуандун муж болон олон улсын бизнесийн байгууллагуудын хамтын ажиллагааг өргөжүүлэх, харилцан ашигтай түншлэлийг бэхжүүлэхэд чухал хувь нэмэр оруулсныг зохион байгуулагчид онцлон тэмдэглэв. МҮХАҮТ нь БНХАУ-ын Олон улсын худалдааг дэмжих зөвлөл (CCPIT) болон түүний орон нутгийн салбаруудтай тогтоосон түншлэлээ шинэ шатанд гаргаж, хоёр орны бизнес эрхлэгчдийг холбох гүүр нь байхаа илэрхийллээ. Цаашид талууд худалдаа, хөрөнгө оруулалтыг нэмэгдүүлэх, ханган нийлүүлэлтийн сүлжээг өргөжүүлэх чиглэлээр бизнес форум, үзэсгэлэн худалдааг тогтмолжуулж, эдийн засгийн харилцан ашигтай хамтын ажиллагааг тууштай дэмжин ажиллахаар тохиролцов.
