МҮХАҮТ-ЫН ЕРӨНХИЙЛӨГЧ Б.ЛХАГВАЖАВ БНХАУ ДАХЬ ТӨЛӨӨЛӨГЧДИЙН ҮЙЛ АЖИЛЛАГААНЫ ТАЙЛАНТАЙ ТАНИЛЦЛАА
МҮХАҮТ-ын Ерөнхийлөгч Б.Лхагважав Танхимын Бээжин дэх Төлөөлөгчийн газрын үйл ажиллагаатай танилцаж, БНХАУ дахь төлөөлөгчдийн 2026 оны эхний хагас жилийн үйл ажиллагааны тайланг сонслоо. Уулзалтад МҮХАҮТ-ын БНХАУ дахь тэргүүн төлөөлөгч О.Амарболд, Шанхай хот дахь төлөөлөгч Б.Золцэнгэл, Гуандун муж дахь төлөөлөгч Б.Эрдэнэ-Оюун нар оролцож, хариуцсан бүс нутгуудад хэрэгжүүлсэн ажлын үр дүн, бизнесийн хамтын ажиллагааны ололт амжилт, цаашдын зорилт, төлөвлөгөөний талаар дэлгэрэнгүй танилцуулга хийлээ.
Төлөөлөгчид тайлант хугацаанд Монгол, Хятадын худалдаа, эдийн засаг, хөрөнгө оруулалтын хамтын ажиллагааг өргөжүүлэх, хоёр улсын аж ахуйн нэгжүүдийн харилцаа холбоог бэхжүүлэх, бизнес форум, үзэсгэлэн яармаг, худалдааны уулзалт, хөрөнгө оруулалтын арга хэмжээнд Монголын аж ахуйн нэгжүүдийн оролцоог нэмэгдүүлэх чиглэлээр хэрэгжүүлсэн ажлуудаа танилцуулсан юм. МҮХАҮТ-ын Бээжин хот дахь Төлөөлөгчийн газар нь байгуулагдсанаасаа хойш хоёр жилийн хугацаанд тасралтгүй үйл ажиллагаа явуулж, Монгол, Хятадын бизнесийн хамтын ажиллагааг өргөжүүлэх, аж ахуйн нэгжүүдэд зах зээлийн мэдээлэл хүргэх, боломжит түншүүдтэй холбох, хөрөрийн боломжийг нэмэгдүүлэхэд чиглэсэн олон талт ажлыг амжилттай хэрэгжүүлж байна. Мөн Бээжин, Шанхай болон Гуандун муж дахь төлөөлөгчид Монголын аж ахуйн нэгжүүдийг БНХАУ-ын бүс нутгийн зах зээлтэй холбох, хамтын ажиллагааны шинэ боломжуудыг эрэлхийлэх, хөрөнгө оруулагчид болон бизнесийн байгууллагуудтай үр дүнтэй хамтран ажиллахад онцгой анхаарч ажиллаж буйгаа онцоллоо.
Тайлантай танилцсаны дараа МҮХАҮТ-ын Ерөнхийлөгч Б.Лхагважав төлөөлөгчдийн үйл ажиллагааны үр дүнг өндрөөр үнэлж, БНХАУ дахь төлөөлөгчдийн сүлжээ нь Монголын хувийн хэвшлийн байгууллагуудын гадаад хамтын ажиллагааг өргөжүүлэх, экспорт, хөрөнгө оруулалтыг нэмэгдүүлэх, хоёр улсын худалдаа, эдийн засгийн харилцааг шинэ түвшинд хүргэхэд чухал үүрэг гүйцэтгэж байгааг онцлон тэмдэглэлээ. Түүнчлэн цаашид Монголын бизнес эрхлэгчдийг БНХАУ-ын зах зээлд илүү өргөн хүрээнд нэвтрүүлэх, хөрөнгө оруулалтын бодит төслүүдийг дэмжих, худалдааг хөнгөвчлөх, бүс нутгийн хамтын ажиллагааг өргөжүүлэх чиглэлээр төлөөлөгчдийн үйл ажиллагааг улам эрчимжүүлж ажиллахыг үүрэг болгов. Уулзалтын үеэр 2026 оны хоёрдугаар хагас жилийн үйл ажиллагааны төлөвлөгөө, хэрэгжүүлэх томоохон арга хэмжээ, хамтын ажиллагааны тэргүүлэх чиглэлүүдийн талаар санал солилцож, Монгол, Хятадын бизнесийн харилцааг улам өргөжүүлэхэд чиглэсэн тодорхой зорилтуудыг дэвшүүллээ.
