МҮХАҮТ-ЫН ЕРӨНХИЙЛӨГЧ Б.ЛХАГВАЖАВ CCPIT-ИЙН ДАРГА РЭН ХУНБИНТАЙ УУЛЗАЖ, ХАМТЫН АЖИЛЛАГААГ ШИНЭ ШАТАНД ГАРГАХААР ТОХИРОЛЦОВ
Ханган нийлүүлэлтийн сүлжээний IV удаагийн олон улсын экспогийн үеэр Монголын Үндэсний Худалдаа Аж Үйлдвэрийн Танхимын Ерөнхийлөгч Б.Лхагважав БНХАУ-ын Олон улсын худалдааг дэмжих хороо (CCPIT)-ны дарга Рэн Хунбинтай албан ёсны уулзалт хийлээ. Уулзалтын эхэнд МҮХАҮТ-ын Ерөнхийлөгч Б.Лхагважав 2026 оны 9 дүгээр сарын 17-18-ны өдрүүдэд Улаанбаатар хотноо зохион байгуулагдах Монгол-Орос-Хятадын Худалдаа, аж үйлдвэрийн танхимуудын XIX форумд оролцох албан ёсны урилгыг Рэн Хунбин даргад гардуулан өгч, форумын бэлтгэл ажлын талаар санал солилцов.
Талууд Монгол, Хятадын худалдаа, эдийн засгийн хамтын ажиллагааг өргөжүүлэх, бизнесийн байгууллагуудын түншлэлийг идэвхжүүлэх, бүс нутгийн болон олон улсын ханган нийлүүлэлтийн сүлжээг бэхжүүлэх асуудлаар дэлгэрэнгүй ярилцсан байна. Мөн АТА карней болон барааны гарал үүслийн гэрчилгээний тогтолцоонд дижитал технологийг үе шаттайгаар нэвтрүүлэх, цахим баталгаажуулалтын системийг хөгжүүлэх, мэдээлэл солилцооны уялдаа холбоог сайжруулах замаар худалдааг хөнгөвчлөх чиглэлээр хамтын ажиллагаагаа өргөжүүлэхээр санал нэгдэв.
Үүний зэрэгцээ талууд хиймэл оюун ухаан (AI), хүний нөөц болон үйлдвэрлэлийн шинэ технологийн уялдаанд суурилсан аж үйлдвэрийн хөгжлийн шинэ чиг хандлагыг хэлэлцэж, дижитал эдийн засаг, ухаалаг үйлдвэрлэл, инноваци, үйлдвэрлэлийн автоматжуулалт болон нийлүүлэлтийн сүлжээний үр ашгийг нэмэгдүүлэх хамтарсан төсөл, санаачилга хэрэгжүүлэх боломжийг хэлэлцлээ. Энэ үеэр Рэн Хунбин дарга БНХАУ-ын 15 дугаар таван жилийн төлөвлөгөөний хүрээнд өндөр чанартай хөгжил, өндөр түвшний нээлттэй бодлого, технологид суурилсан үйлдвэрлэлийн шинэчлэлийг эрчимжүүлж байгааг танилцуулаад, энэ хүрээнд Монголын бизнесийн байгууллагуудтай хамтын ажиллагаагаа өргөжүүлэх бүрэн боломжтойг онцлон тэмдэглэв. МҮХАҮТ-ын Ерөнхийлөгч Б.Лхагважав, Монгол Улсын хувьд хиймэл оюун ухаан, дижитал шилжилт, үйлдвэрлэлийн шинэ технологи, цахим худалдаа болон логистикийн хөгжлийг дэмжих нь эдийн засгийн өрсөлдөх чадварыг нэмэгдүүлэх чухал хүчин зүйл болж байгааг онцолж, энэ чиглэлээр CCPIT болон Хятадын аж ахуйн нэгжүүдтэй хамтрах сонирхолтой байгаагаа илэрхийллээ.
Уулзалтын төгсгөлд талууд МҮХАҮТ болон CCPIT хоорондын стратегийн түншлэлийг улам бэхжүүлж, худалдаа, хөрөнгө оруулалт, үзэсгэлэн яармаг, бизнес форум, инноваци, дижитал эдийн засаг болон өндөр технологийн үйлдвэрлэлийн хамтын ажиллагааг шинэ шатанд гаргахын төлөө хамтран ажиллахаар тохиролцлоо.
