МОНГОЛ, СОЛОНГОСЫН ЭДИЙН ЗАСГИЙН ТҮНШЛЭЛИЙН ХЭЛЭЛЦЭЭРИЙН ТӨСЛИЙН ГАРАЛ ҮҮСЛИЙН ДҮРМИЙН ТАЛААР УУЛЗАЛТ БОЛЛОО
Эдийн засаг, хөгжлийн яам, Гаалийн ерөнхий газар болон Монголын Үндэсний Худалдаа Аж Үйлдвэрийн Танхим хамтран Монгол Улс, Бүгд Найрамдах Солонгос Улс хоорондын Эдийн засгийн түншлэлийн хэлэлцээрийн төслийн гарал үүслийн дүрмийн бүлгийн хүрээнд бизнес эрхлэгчидтэй санал солилцох салбарчилсан уулзалтыг зохион байгууллаа.
Тус уулзалтад хэлэлцээрийн гарал үүслийн дүрмийн бүлгийн ажлын хэсгийн бүрэлдэхүүнд ажиллаж буй Эдийн засаг, хөгжлийн яам, Гаалийн ерөнхий газар, МҮХАҮТ-ын төлөөллүүдээс гадна дотоодын үйлдвэрлэлийн голлох салбарынхан идэвхтэй оролцов. Тодруулбал, МҮХАҮТ-ын дэргэдэх Ноос ноолуурын зөвлөл, Монголын ноос ноолуурын холбоо, Монголын ноосон бүтээгдэхүүн үйлдвэрлэгчдийн холбоо, Монголын арьс ширний үйлдвэрлэлийн холбоо болон Хувцас үйлдвэрлэл, оёдлын мэргэжлийн нэгдсэн холбооны төлөөллүүд оролцож, хэлэлцээрийн төсөлд тусгах саналаа харилцан солилцсон юм.
Хоёр улсын худалдааны эргэлтийн статистикийг авч үзвэл, 2025 оны жилийн эцсийн байдлаар Монгол Улс болон БНСУ хоорондын нийт худалдаа 507.3 сая ам.долларт хүрсэн байна. Үүнээс Монгол Улсаас БНСУ руу 39.0 сая ам.долларын үнэ бүхий 227 нэр төрлийн бараа бүтээгдэхүүн экспортолсон бол БНСУ-аас Монгол Улс руу 468.3 сая ам.долларын үнийн дүнтэй 1112 нэр төрлийн бараа бүтээгдэхүүн импортолжээ.
Ингэснээр хоёр улсын худалдааны харьцаа 8:92 хувьтай буюу Монгол Улс 429.3 сая ам.долларын гадаад худалдааны алдагдалтай байгаа бөгөөд шинээр байгуулах Эдийн засгийн түншлэлийн хэлэлцээр нь энэхүү тэнцвэргүй байдлыг засах, дотоодын экспортыг дэмжихэд чухал ач холбогдолтой юм.
