“МОНГОЛ–ХБНГУ-ЫН ТУРШЛАГА СОЛИЛЦОХ УУЛЗАЛТ” ЗОХИОН БАЙГУУЛАГДЛАА
Монголын Үндэсний Худалдаа Аж Үйлдвэрийн Танхим ХБНГУ-ын орон нутгийн удирдлага, бизнесийн байгууллагуудын төлөөлөгчдийг хүлээн авч, “Монгол–ХБНГУ-ын туршлага солилцох уулзалт”-ыг амжилттай зохион байгууллаа. Тус уулзалт нь Герман улсын Хот, суурин газрын түншлэлийн хөтөлбөрийн хүрээнд өрнөсөн бөгөөд хоёр улсын эдийн засаг, бизнесийн хамтын ажиллагааг өргөжүүлэх, харилцан туршлага солилцох, орон нутгийн хөгжлийн чиглэлээр түншлэл тогтоох зорилготой бөгөөд төлөөлөгчдийн бүрэлдэхүүнд Барут/Марк, Шөнөфельд болон Кассель зэрэг хотуудын захиргаа, Худалдаа аж үйлдвэрийн танхим, судалгааны институтийн удирдлагуудаас гадна эдийн засгийн хөгжлийн мэргэжилтнүүд, бизнес эрхлэгчид багтжээ.
Уулзалтыг МҮХАҮТ-ын Ерөнхийлөгчийн зөвлөх М.Сарандаваа болон “Engagement Global” байгууллагын төслийн менежер Фараз Дахар нар нээж үг хэллээ. Тэд орон нутгийн захиргаа, бизнесийн байгууллага болон хөгжлийн түншүүдийн хамтын ажиллагааг бэхжүүлэх нь тогтвортой эдийн засгийн өсөлт, бүс нутгийн хөгжлийг дэмжихэд чухал ач холбогдолтой болохыг онцлов. Мөн энэхүү яриа хэлэлцээ нь орон нутгийн захиргаа болон эдийн засгийн оролцогч талуудын холбоо харилцааг бэхжүүлснээр хүртээмжтэй, тогтвортой хөгжлийг бий болгоход чухал түлхэц үзүүлнэ гэдэгт санал нэгдсэн юм.
Арга хэмжээний үеэр МҮХАҮТ-ын Ерөнхий нарийн бичгийн дарга Б.Саруул “Монголын бизнесийн орчин” сэдвээр илтгэл тавьж, Монгол Улсын эдийн засгийн өнөөгийн нөхцөл байдал, хөрөнгө оруулалтын боломж, хувийн хэвшлийн хөгжлийн чиг хандлагыг танилцууллаа. Илтгэлийн дараа талууд төр, хувийн хэвшлийн түншлэлийн механизм, бизнес эрхлэлтийг дэмжих бодлого, хөрөнгө оруулалт, инноваци, тогтвортой хот байгуулалт болон жижиг, дунд бизнесийг (ЖДҮ) хөгжүүлэх чиглэлээр санал солилцов.
Энэ үеэр Германы төлөөлөгчид орон нутгийн эдийн засгийг төрөлжүүлэх, засаглалыг сайжруулах болон олон улсын түншлэлийг өргөжүүлэх чиглэлээр өөрсдийн хэрэгжүүлсэн шилдэг туршлага, бодит кэйсээс хуваалцсан юм.
МҮХАҮТ-ын зүгээс цаашид ч олон улсын бизнесийн хамтын ажиллагааг бүх талаар дэмжиж, Монгол Улсын эдийн засгийн өрсөлдөх чадварыг дээшлүүлэх, дэлхийн зах зээлд интеграцчилагдахад нь гүүр болон ажиллахаа илэрхийллээ.
Уулзалтын төгсгөлд нээлттэй хэлэлцүүлэг өрнөж, оролцогчид цаашид хамтран хэрэгжүүлэх боломжтой төсөл, санаачилгууд болон хоёр улсын эдийн засгийн харилцааг гүнзгийрүүлэх боломжуудын талаар санал бодлоо солилцсоноор арга хэмжээ өндөрлөв.
