МОНГОЛ – СОЛОНГОСЫН БИЗНЕС УУЛЗАЛТЫГ АМЖИЛТТАЙ ЗОХИОН БАЙГУУЛЛАА

МҮХАҮТ нь БНСУ-ын Жэжүгийн Худалдаа, Аж Үйлдвэрийн Танхимын Залуу бизнес эрхлэгчдийн зөвлөлтэй хамтран Монгол–Солонгосын бизнес уулзалтыг амжилтай зохион байгууллаа.

Уулзалтад аялал жуулчлал, барилга, технологи, инновацын салбарын бизнесийн төлөөллүүд өргөнөөр оролцсон бөгөөд МҮХАҮТ-ын Гүйцэтгэх захирал Ц.Магнайбаатар болон Жэжүгийн ХАҮТ-ын Залуу бизнес эрхлэгчдийн зөвлөлийн дарга И Жэ Со нар нээж үг хэлэв.

МҮХАҮТ-ын Гүйцэтгэх захирал Ц.Магнайбаатар нээлтийн үгэндээ Жэжү арал нь аялал жуулчлал, инновац, тогтвортой хөгжлөөрөө олон улсад танигдсан бүс нутаг болохыг онцлоод, Монгол Улсын уул уурхай, сэргээгдэх эрчим хүч, хөдөө аж ахуй, хүнсний үйлдвэрлэл, дижитал шилжилтийн салбарын боломжуудыг танилцууллаа. Тэрбээр эдгээр давуу талуудыг уялдуулснаар аялал жуулчлал, инновац, ногоон хөгжил, гарааны бизнес болон дэвшилтэт технологийн чиглэлд хамтын ажиллагааг өргөжүүлэх бүрэн боломжтойг онцоллоо.

Арга хэмжээний онцлох хэсэг нь хоёр улсын залуу бизнес эрхлэгчдийн идэвхтэй оролцоо байсан бөгөөд энэ нь Монгол–Солонгосын эдийн засгийн харилцаанд залуучуудын манлайлал өсөн нэмэгдэж буйг харуулж байна.

Уулзалтын төгсгөлд МҮХАҮТ-ын дэргэдэх Бизнес эрхлэгч залуучуудын зөвлөлийн дарга Г.Мөнх-Эрдэнэ, Жэжү ХАҮТ-ын Залуу бизнес эрхлэгчдийн зөвлөлийн дарга И Жэ Со нар хамтын ажиллагааны санамж бичигт гарын үсэг зурлаа. Энэхүү хамтын ажиллагаа нь хоёр улсын залуу бизнес эрхлэгчдийн түншлэлийг  бэхжүүлэхэд чухал алхам болох ажээ.