МҮХАҮТ-ЫН ЕРӨНХИЙЛӨГЧ Б.ЛХАГВАЖАВ БНСУ-ЫН ХУДАЛДААНЫ САЙД Ё ХАН ГҮ -Г ХҮЛЭЭН АВЧ УУЛЗЛАА
Монголын Үндэсний Худалдаа, Аж Үйлдвэрийн Танхимын Ерөнхийлөгч Б.Лхагважав Бүгд Найрамдах Солонгос Улсын Худалдааны сайд Ё Хан Гү болон албаны бусад төлөөлөгчдийг хүлээн авч уулзлаа. Уулзалтын үеэр хоёр улсын худалдаа, эдийн засгийн хамтын ажиллагааг өргөжүүлэх, чөлөөт худалдааны хэлэлцээ болон ирээдүйн бизнесийн хамтын ажиллагааны талаар санал солилцов.
Уулзалтын үеэр БНСУ-ын Худалдааны сайд Ё Хан Гү Эдийн засгийн түншлэлийн хэлэлцээрийг ойрын хугацаанд амжилттай байгуулах нь Монгол, Солонгосын худалдаа, хөрөнгө оруулалтын хамтын ажиллагааг шинэ шатанд гаргах чухал алхам болохыг онцоллоо. Мөн уг хэлэлцээр нь худалдааны тэнцвэртэй хөгжлийг хангах, бизнесийн орчныг сайжруулах, өрсөлдөөний тэгш нөхцөлийг бүрдүүлэхэд чиглэх ёстой гэдгийг тэмдэглэв.МҮХАҮТ-ын Ерөнхийлөгч Б.Лхагважав Монгол Улс 11 жилийн өмнө Бүгд Найрамдах Япон Улстай чөлөөт худалдааны хэлэлцээр (EPA)-ийг байгуулж байсан туршлагатай болохыг онцлов. Түүнчлэн Монгол Улс болон Евразийн эдийн засгийн холбооны гишүүн орнуудын хооронд байгуулсан Түр худалдааны хэлэлцээр ойрын хугацаанд хэрэгжиж эхлэх гэж байгаа нь Монголын экспортын зах зээлийг өргөжүүлэх, худалдаа, эдийн засгийн хамтын ажиллагааг шинэ шатанд гаргах чухал боломжийг бүрдүүлж байгааг тэмдэглэлээ.
Талууд эдийн засгийн түншлэлийн хэлэлцээр нь хоёр улсын хувьд “эдийн засгийн шинэ хурдны зам” буюу шинэ боломж, потенциал бүрдүүлэхэд чухал ач холбогдолтойг онцлон тэмдэглэв.
Монгол Улс, Бүгд Найрамдах Солонгос Улс 1990 онд дипломат харилцаа тогтоосноос хойш улс төр, эдийн засаг, худалдаа, хөрөнгө оруулалт, боловсрол, шинжлэх ухаан, технологи, соёл, иргэдийн солилцооны чиглэлээр хамтын ажиллагаагаа тасралтгүй өргөжүүлэн хөгжүүлж ирсэн. 2021 онд хоёр улсын харилцаа “Стратегийн түншлэл”-ийн түвшинд хүрснээр хамтын ажиллагааны шинэ үе шат эхэлсэн бөгөөд Эдийн засгийн хамтын ажиллагаа нь энэхүү түншлэлийн гол тулгуур хэвээр байна.
Уулзалтын төгсгөлд удахгүй зохион байгуулагдах БНСУ-аас Монгол Улсад хийх төрийн айлчлалын хүрээнд зохион байгуулагдах Бизнес форумын бэлтгэл ажлын талаар санал солилцож, хоёр улсын бизнес эрхлэгчдийг холбох, хамтын ажиллагааг өргөжүүлэх, шинэ түншлэл бий болгох чиглэлд хамтран ажиллахаар тохиролцов.
