МОНГОЛ-АВСТРИЙН БИЗНЕС ФОРУМ ЗОХИОН БАЙГУУЛАГДЛАА
МҮХАҮТ, Австрийн Худалдааны Танхимын олон улсын худалдааг дэмжих байгууллага болох "ADVANTAGE AUSTRIA" болон бусад холбогдох албаныхан хамтран хоёр улсын худалдаа, хөрөнгө оруулалт, технологийн түншлэлийг шинэ шатанд гаргах, бизнес эрхлэгчдийн хамтын ажиллагааг өргөжүүлэх зорилгоор “Монгол-Австрийн Бизнес Форум”-ыг зохион байгууллаа.
Тус форумд Бүгд Найрамдах Австри Улсаас Монгол Улсад хавсран суугаа Онц бөгөөд Бүрэн эрхт Элчин сайд ноён Вольф-Дитрих Хайм, МҮХАҮТ-ын Ерөнхийлөгч Б.Лхагважав, Монгол Улсын ГХЯ-ны Олон улсын худалдаа, эдийн засгийн газрын захирал Г.Өлзийсайхан, Австрийн Холбооны Эдийн засаг, Эрчим хүч, Аялал жуулчлалын яамны Гадаад эдийн засгийн харилцааны газрын дарга хатагтай Элизабет Вайсенбёк болон хоёр улсын төрийн байгууллага, бизнесийн салбарын тэргүүлэх төлөөллүүд оролцов.
Уулзалтыг нээж МҮХАҮТ-ын Ерөнхийлөгч Б.Лхагважав хэлсэн үгэндээ хоёр улсын найрсаг харилцаа нь харилцан итгэлцэл дээр суурилж ирснийг тэмдэглээд, Австрийн дэвшилтэт технологи, инновацын шийдлийг Монголын өсөн нэмэгдэж буй зах зээл, байгалийн баялагтай хослуулснаар харилцан ашигтай төслүүдийг хэрэгжүүлэх өргөн боломж байгааг онцолсон юм.
Форумын үеэр эрүүл мэндийн дэд бүтэц, сэргээгдэх эрчим хүч, тээвэр, уул уурхай, боловсрол, соёлын чиглэлээр үйл ажиллагаа явуулдаг Австрийн дэлхийд танигдсан "AME International", "Amex Healthcare", "Odelga Med Engineering", "Getzner Werkstoffe", "GUGLER Water Turbines", "Montanuniversität Leoben", "Waagner-Biro Austria Stage System" зэрэг тэргүүлэгч компаниуд өөрсдийн технологи, ноу-хаугаа дэлгэрэнгүй танилцуулав.
Уулзалтын үр дүнд хоёр орны ирээдүйн хамтын ажиллагааны суурь тавигдсан бөгөөд МҮХАҮТ-ын зүгээс Австрийн дэвшилтэт ноу-хау, технологийг Монголд нутагшуулах, бизнес эрхлэгчдийг урт хугацаанд тогтвортой түншлэхэд нь бүхий л талаар гүүр болон ажиллахаа илэрхийллээ.
