МҮХАҮТ КАНАДЫН “STEP” БАЙГУУЛЛАГАТАЙ ХӨДӨӨ АЖ АХУЙН ШИНЭ БОЛОМЖУУДЫГ ХЭЛЭЛЦЛЭЭ
МҮХАҮТ-ын Гүйцэтгэх захирал Ц.Магнайбаатар Канад улсын Саскачеван мужийн хувийн хэвшлийн экспортлогчдыг төлөөлдөг “Saskatchewan Trade & Export Partnership” (STEP) байгууллагын Ази хариуцсан захирал ноён И Зэн болон Канад Улсаас Монгол Улсад суугаа элчин сайдын яамны худалдааны төлөөлөгч Г.Цолмон нартай уулзалт хийлээ.
Уулзалтад Метагро, Пример Агро, Мөнх ногоон хүлэмж зэрэг Танхимын гишүүн хөдөө аж ахуйн 8 байгууллагын төлөөлөл оролцож, хоёр улсын худалдаа, технологийн түншлэлийг өргөжүүлэх шинэ боломжуудын талаар санал солилцов.
Саскачеван муж нь үр тариа, дэвшилтэт техник, тэжээлийн технологийн дэлхийн гол экспортлогч бөгөөд уулзалтын үеэр Монголын тариаланчдад Канадын өндөр стандартын тоног төхөөрөмж, ноу-хауг баталгаат үйлдвэрлэгчдээс нь зуучлагчгүйгээр, шууд импортлох гарцуудыг хэлэлцсэн байна.
Мөн тус мужид жилд хоёр удаа болдог ХАА-н олон улсын арга хэмжээнд Монголын аж ахуйн нэгжүүдийг тогтмол оролцуулах замаар кластерын түншлэл тогтоох, эрчимжсэн мал аж ахуй, хүлэмжийн чиглэлд технологи нутагшуулах B2B уулзалтуудыг шат дараатай зохион байгуулахаар тохиролцлоо.
Талууд ийнхүү шууд харилцаа тогтоосноор импортын тээвэр логистикийг оновчтой болгож, Монголын хөдөө аж ахуйн салбарт дэлхийн жишиг технологиудыг хамгийн дөхөм замаар нэвтрүүлэх бодит боломж бүрдэх юм.
