ЦАХИМ ЭДИЙН ЗАСАГ ДАХЬ ЭМЭГТЭЙ ЭКСПОРТЛОГЧДЫГ ДЭМЖИХ САНГИЙН (WEIDE FUND) ТӨСЛИЙН DISCOVERY ШАТНЫ СУРГАЛТУУД АМЖИЛТТАЙ ЗОХИОН БАЙГУУЛАГДЛАА
Монголын Үндэсний Худалдаа Аж Үйлдвэрийн Танхимаас хэрэгжүүлж буй “Цахим эдийн засаг дахь эмэгтэй экспортлогчдыг дэмжих сан” буюу WEIDE Fund төслийн Discovery шатны сургалт, чадавхжуулах хөтөлбөрүүд амжилттай зохион байгуулагдаж дууслаа. Тус төслийн Discovery шатанд нийт 19 аж ахуйн нэгж шалгарч, 2026 оны 5 дугаар сард тус бүр 5,000 ам.долларын санхүүгийн буцалтгүй тусламж хүртэн бизнесээ өргөжүүлэх, дотоод нөөц, чадавхаа нэмэгдүүлэх боломжийг бүрдүүлээд байна.
Төслийн хүрээнд оролцогч аж ахуйн нэгжүүд санхүүгийн удирдлага, үнэ тогтоолт, хөрөнгө оруулагч болон санхүүгийн байгууллагуудтай хамтран ажиллах арга замууд (Engaging Capital Providers), зорилго тодорхойлох, бизнесийн өсөлтийн төлөвлөлт, дижитал маркетингийн стратеги зэрэг чиглэлээр цогц сургалт, зөвлөх үйлчилгээ, менторшип хөтөлбөрт хамрагдлаа.
Мөн SEO, сошиал медиа болон и-мэйл маркетинг зэрэг дижитал хэрэгслүүдийн ашиглалт, борлуулалтыг нэмэгдүүлэх хэрэглэгчийн үйлчилгээний тогтолцоог бүрдүүлэх, хэлэлцээр хийх ур чадвар (Negotiation Skills), цагийн менежмент, хувь хүний хөгжил болон манлайллын ур чадварын сургалтуудыг багтаасан байна.
Эдгээр сургалт, зөвлөх үйлчилгээний үр дүнд оролцогчид экспортын үйл ажиллагаагаа өргөжүүлэх, цахим худалдааны сувгуудаар дамжуулан олон улсын зах зээлд өрсөлдөх чадвараа нэмэгдүүлэхэд шаардлагатай мэдлэг, ур чадварыг эзэмшсэн юм.
Тус сургалтыг WEIDE төслийн сургагч багш Н.Энхсайхан, З.Одмаа болон Э.Сүндэр нар удирдан зохион байгууллаа. Цаашид төслийн “Booster” ангиллын аж ахуйн нэгжүүдэд зориулсан сургалт, менторшип, бизнес хөгжлийн дэмжлэг болон санхүүжилтийн үйл ажиллагаа 2026 оныг дуустал үргэлжлэн хэрэгжих ажээ.
WEIDE Fund төсөл нь эмэгтэй бизнес эрхлэгчдийн цахим худалдаа, экспортын чадавхыг бэхжүүлэх, олон улсын зах зээлд гарах боломжийг нэмэгдүүлэх, тогтвортой өсөлтийг дэмжих үндсэн зорилготой юм.
